COMMUNIST PARTY OF INDIA (MARXIST - LENINIST) - LIBERATION

COMMUNIST PARTY OF INDIA (MARXIST - LENINIST) - LIBERATION, TAMILNADU

Wednesday, January 15, 2014

எனினும் நாங்கள் போராடுவோம்

எமக்கு லட்சியம் உண்டு
ஆனால் அதிகாரம் இல்லை
உம்மிடம் அதிகாரம் உண்டு
ஆனால் லட்சியம் இல்லை
நீ நீயாக இரு
நாங்கள் நாங்களாகவே இருப்போம்
இதில் சமரசத்திற்கு இடமில்லை
நமது போர்க்களம் துவங்கட்டும்

எம்மிடம் சத்தியம் உண்டு
ஆனால் ....... படைகள் இல்லை
உம்மிடம் (அடியாட்கள்) படைகள் உண்டு
ஆனால் சத்தியம் இல்லை
நீ நீயாக இரு
நாங்கள் நாங்களாகவே இருப்போம்
இதில் சமரசத்திற்கு இடமில்லை
நமது போர்களம் துவங்கட்டும்

நீங்கள் எமது மண்டையை பிளக்கலாம்
எனினும் நாங்கள் போராடுவோம்
நீங்கள் எங்கள் எலும்புகளை நொறுக்கலாம்
எனினும் நாங்கள் போராடுவோம்
நீங்கள் எம்மை உயிருடன் புதைக்கலாம்
எனினும் நாங்கள் போராடுவோம்

சத்தியம் எங்களுள் சக்தியாய்ப் பாயும்
நாங்கள் போராடுவோம்
எங்கள் கடைசித்துளி ரத்தம் உள்ளவரை
நாங்கள் போராடுவோம்

எங்கள் கடைசி மூச்சு உள்ளவரை
நாங்கள் போராடுவோம்
உங்கள் பொய்மைக் கோட்டைகள்
நொறுங்கித் தரை மட்டமாகும் வரை
நாங்கள் போராடுவோம்

உங்கள் பொய்மை பிசாசுகள்
எங்கள் சத்திய தேவதையின் முன்
மண்டியிடும் வரை
நாங்கள் போராடுவோம்

- லட்சுமணன்



ஜனவரி 6 அன்று திருபெரும்புதூரில் புரட்சிகர இளைஞர் கழகத்தின் பொதுக் கூட்டம் நடந்து கொண்டிருந்தபோது, ஏசியன் பெயிண்ட் தொழிலாளர் போராட்டம் பற்றி அறிந்த பகுதியைச் சேர்ந்த ஓய்வு பெற்ற ஆசிரியரான திரு.லட்சுமணன், அவர்கள் போராட்டம் பற்றி எழுதிய பாடல் என்று மேடையில் கொடுத்தது.

மக்கள் பிரச்சனைகள் மீதான போராட்டம்தான் ஒரே பொருத்தப்பாடு

2011ல் முதலமைச்சராக பதவியேற்றபோது, ஜெயலலிதாவுக்கு நிரந்தர முதலமைச்சர் கனவு மட்டும் இருந்தது. அதனால் வந்த சில நாட்களில் லட்சியம் 2023 திட்டம் முன்வைத்து அடுத்த இரண்டு தொடர் ஆட்சி காலங்கள் பதவியில் தொடரும் தனது லட்சியத்தை வெளிப்படுத்தினார். இப்போது அவருக்கு பிரதமர் கனவுக்கான புறநிலை கனிந்திருப்பதாக அஇஅதிமுககாரர்கள் சொல்கிறார்கள்.

முதலாளித்துவ கட்சிகள் பலவீனமானவை. ஏனென்றால் அவை நாட்டின் பெரும்பான்மை நலன்களுக்கு எதிரானவை. எதிரானவை என்பதை மூடிமறைக்கவும் முடியாதவை. அந்த பலவீனமான கட்சிகள் தங்களுக்குள் போட்டி போடுகின்றன. பலவீனமானவற்றுள் மிகவும் பலவீனமான காங்கிரஸ் இடத்தை பிடிக்கப்போவது யார் என்பதில் போட்டி.

முதலாளித்துவத்தில் பாட்டாளி வர்க்கம் மட்டும் அல்ல, முதலாளித்துவ அரசியல் கட்சிகளும் தங்களுக்குள் போட்டி போட்டுக் கொள்ளும்.
போட்டியில் மோடி எதிர் ஜெயலலிதா என்று வந்துவிடுமா?

துரதிர்ஷ்டவசமாக த.பாண்டியனும் சோ ராமசாமியும் கிட்டத்தட்ட ஒரே விதமான கருத்தை வெளியிடுகிறார்கள். இலங்கை தமிழர்களுக்கு எதிராக செயல்படும் காங்கிரசை ஜெயலலிதா மட்டுமே எதிர்ப்பதாகவும், இலங்கை சிறைகளில் வாடும் தமிழக மீனவர் துயர்தீர்க்க ஜெயலலிதா மட்டுமே ஆக்கபூர்வ நடவடிக்கைகள் எடுப்பதாகவும் அதனால் இந்திய கம்யூனிஸ்ட் கட்சி ஜெயலலிதாவை ஆதரிப்பதாகவும், இககமாவும் இதே கருத்து கொண்டுள்ளதாகவும், இகக, இககமா, அஇஅதிமுக மத்தியில் புரிதல் இருப்பதாகவும் மத்தியில் மதச்சார்பற்ற அரசாங்கம் அமையும் என்றும் சொல்கிறார்.

ஜெயலலிதா பிரதமர் என்பதை மட்டும்தான் அவர் சொல்லவில்லை. மாநிலங்களவை உறுப்பினர் விசயத்தில் அவர் கட்சி சொன்னதற்கேற்ப நடக்க வேண்டியிருந்தது. நிதிஷ் கூட இன்று அவர்களுக்கு மதச்சார்பற்ற தலைவர். அங்கும் போட்டி அதிகம்.

சோ, ஆம் ஆத்மி கட்சியை ஒரு கை பார்த்துவிட்டு மோடி பிரதமர் ஆகவில்லை என்றால் ஜெயலலிதாவை, பாஜக பிரதமர் ஆக்க வேண்டும் என்கிறார். தமிழ்நாட்டில் பாஜக தலைமையில் தேர்தலுக்கு முந்தைய கூட்டணி அமைக்க காந்தியவாதி தமிழருவி மணியன் பெருமுயற்சிகள் எடுத்துக் கொண்டிருக்கும்போது, ஆர்எஸ்எஸ்காரரான சோ ராமசாமி, பாஜகவுடன் ஜெயலலிதா கூட்டணி அமைக்க வேண்டும் என்று சொல்வதை தவிர்க்கிறார். இப்போது ஜெயலலிதா பாஜக பக்கம் போனால் தமிழ்நாட்டில் கரை காண முடியாது என்று ஜெயலலிதாவின் அரசியல் ஆலோசகரான சோவுக்கு தெரியும். ஆயினும் ஜெயலலிதாவும் பாஜக சக்திதான் என்பதை பாஜகவுக்கு நினைவுபடுத்துகிறார். தேர்தலுக்கு முந்தைய கூட்டணி என்று முன்வைக்காமல், ஜெயலலிதா இடதுசாரி கட்சிகளுடன் கூட்டணி அமைத்து, தேர்தல்களில் வெற்றி பெற்ற பிறகு ஜெயலலிதாவை ஆதரித்துக் கொள்ளலாம் என்கிறார். ஆனால், ஒரு விசயம் தெளிவு. மோடி பிரதமர் ஆகமுடியும் என்று ஆர்எஸ்எஸ் சக்திகளுக்குக் கூட நம்பிக்கை இல்லை.

மோடி பிரதமராவது பற்றிய தனது நம்பிக்கையின்மையை வெளிப்படுத்திய சோ ராமசாமி, கம்யூனிசத்தின் பொருத்தப்பாடின்மை  பற்றியும் கருத்து தெரிவித்திருக்கிறார். சோவியத் சரிவு, சீன சந்தை பொருளாதாரம், மேற்கு வங்கம் என்று கூறியது கூறுகிறார். தமிழ்நாட்டில் இகக, இககமா கட்சிகள்தான் இன்று ஜெயலலிதாவுக்கு மதச்சார்பற்ற முகம் தந்து கொண்டிருக்கிறார்கள்.

ஜெயலலிதா எப்படியாவது தேர்தலில் வெற்றி பெற்று, மோடியால் முடியாமல் போனால், ஜெயலலிதா மதவாத பாஜகவின் ஆதரவுடன் பிரதமராக வேண்டும் என்பது சோ ராமசாமியின் கணக்கு.

ஜெயலலிதா நாளை என்ன செய்வார் என்று சோ ராமசாமி ஒளிவுமறைவின்றி சொல்லியுள்ளார். நாளை அவர் பாஜக பக்கம் சாய்வார். நாளை அது ஜெயலலிதாவை பாஜக ஆதரவுடன் பிரதமர் ஆக்குவது என்பது வெளியே சொல்லப்படுவது. மோடி பிரதமராவதில் சிக்கல் ஏற்பட்டால் ஜெயலலிதா மோடி பக்கம் நிற்க வேண்டும் என்பது சொல்லாமல் புரிந்து கொள்ளப்படுவது. தமிழ்நாட்டு பாஜகவுக்கும் பதட்டம் வேண்டாம், ஜெயலலிதா நம் பக்கம் என்ற ஆறுதலும் இதில் உள்நிற்கிறது.

தேமுதிகவை தன் பக்கம் ஈர்க்க காங்கிரசும் பாஜகவும் திமுகவும் முயற்சிகள் மேற் கொண்டிருக்கும்போது, இந்திய அரசியல் பற்றி பேசியுள்ள சோ ராமசாமி தேமுதிக பற்றி பேசவில்லை. விஜயகாந்த் தனது கட்சியினருக்கு எந்த கட்சியையும் விமர்சித்து பேச வேண்டாம் என்று சொல்லியுள்ளார்.

சோ ராமசாமியும் அது போன்ற ஒன்றை பின்பற்றியிருக்கிறார். ஏனென்றால், மோடி பிரதமராவது பற்றி நம்பிக்கையின்மை இருப்பது போலவே பாஜகவுக்கு தமிழக அரசியலில் உள்ள இடம் பற்றியும் பாஜகவினருக்கே நம்பிக்கையின்மை தான் இருக்கிறது. பாஜக இங்குள்ள எந்த கட்சியுடனும் கூட்டணி அமைத்தாலும் அமைக்கவில்லை என்றாலும் தமிழ்நாட்டில் பாஜகவுக்கு கடந்த காலம், நிகழ்காலம் எதிர்காலம் எதுவும் இல்லை.
சென்ற முறை காங்கிரசின் ஆதரவு கனிமொழிக்குப் போனதால் கைதவறிப் போன மாநிலங்களவை இடம், இப்போது விஜயகாந்த் கதவை தட்டுகிறது.

கருணாநிதி தாமாக முன்வந்து திமுகவுக்கு இருக்கிற ஒரே மாநிலங்களவை இடத்தை தேமுதிகவுக்கு தருகிறேன் என்கிறார். தொல்.திருமாவும் தேமுதிக பாஜகவுடன் கூட்டணி அமைக்கக் கூடாது என்றும் தமிழ்நாட்டின் இரண்டு பெரிய கட்சிகளான அஇஅதிமுகவும் திமுகவும் பாஜகவுடன் கூட்டணி அமைக்கவில்லை எனும்போது சிறிய கட்சிகள் ஏன் அந்த முடிவெடுக்க வேண்டும் என்று கேட்கிறார். அதாவது, அவர்களுக்கு தெரியாததா விஜயகாந்துக்கு தெரியும் என்று கேட்கிறார்.

விஜயகாந்த் என்ன முடிவு எடுப்பார் என்பதைவிட இடதுசாரிகள் இப்போது என்ன சொல்லப் போகிறார்கள் என்பது முக்கியமான கேள்வி. இகக, இககமா கட்சிகள் சோ ராமசாமிக்கு புரட்சியின் பொருத்தப்பாடு பற்றி பதில் சொல்ல வேண்டும்; ஜெயலலிதா நாளை என்ன செய்வார் என்று சோ ராமசாமி சொல்லி உள்ளதைப்பற்றி தமிழக மக்களுக்கு பதில் சொல்ல வேண்டும்.

முதல் பிரச்சனையில் பதில் சொல்ல வேண்டுமானால், ஜெயலலிதா பக்கம் திரும்பாமல் சொல்ல வேண்டும். இரண்டாவது பிரச்சனையில், ஜெயலலிதா ஆட்சி பற்றி அதிகாரபூர்வ இடதுசாரி கட்சிகள் இத்தனை நாட்கள் சொல்லி வந்த அனைத்துக்கும் பொருத்தப்பாடு இல்லை எனச் சொல்ல வேண்டும்.

என்றும் பொருத்தப்பாடு இருக்கிற ஒரே விசயம் மக்கள் பிரச்சனைகள் மீதான போராட்டங்கள்தான். மக்கள் பிரச்சனைகளை அரசியல் நிகழ்ச்சிநிரலுக்குக் கொண்டு வருவதுதான். 2014க்கு தயாராகும் தமிழ்நாட்டின் கட்சிகளில் எவையும் இன்று தமிழக உழைக்கும் மக்களின் பிரச்சனைகளை முன்னிறுத்தி, இந்தப் பிரச்சனைகளில் உன் நிலை என்ன என்று சொல், உன்னுடன் கூட்டணி அமைக்கிறேன் என்று வேறு எந்த கட்சியிடமும் கேட்கவில்லை. எத்தனை சீட்டு, என்ன வெற்றி வாய்ப்பு என்று மட்டுமே கணக்குகள் போடப்படுகின்றன.

ஆனால், வாக்கு கேட்டு வரும்போது, எங்கள் வாழ்வாதாரப் பிரச்சனைகளில் உங்கள் பதில் என்ன என்று சீற்றத்தில் இருக்கும் தமிழக மக்கள் அவர்களை கேட்பார்கள். அந்த கேள்விகளுக்கு முறையான பதில் சொல்ல முடியாமல் திராவிட கட்சிகள், முதலாளித்துவ ஆளும்கட்சிகள் திணறும்போது, அதிகாரபூர்வ இடதுசாரி கட்சிகள் தங்களுக்கு திணறல் ஏற்படாமல் பார்த்துக் கொள்வது உகந்ததில்லையா?

டாஸ்மாக் கடையை திறக்காதே உழைப்போர் உரிமை இயக்கம் பட்டினிப் போராட்டம், ஆர்ப்பாட்டம்

அம்பத்தூரில் வரதராஜபுரம் பகுதியில் 2013, செப்டம்பரில் டாஸ்மாக் சாராயக்கடை திறக்கப்பட உள்ளதாகச் சொல்லப்பட்டது. உழைப்போர் உரிமை இயக்கம் வட்டாட்சியர் அலுவலகம் வரை ஊர்வலம், ஆர்ப்பாட்டம் என தொடர் போராட்டங்கள் நடத்தியதன் விளைவாக அரசு பின்வாங்கியது. மீண்டும் ஜனவரி 11 அன்று காலை கடை திறக்க ஜனவரி 10 அன்றே அனைத்து ஏற்பாடுகளும் செய்யப்பட்டுவிட்டதாக பகுதி மக்கள் தெரிவித்தனர்.

இககமாலெ பகுதி பொறுப்பாளர் தோழர் புகழ்வேந்தன் தலைமையில் பெரும்பாலான பெண்கள் உட்பட 300க்கும் மேற்பட்டோர் ஜனவரி 11 அன்று ஆர்ப்பாட்டம் நடத்தினர். காவல்துறை கடை திறந்தே ஆக வேண்டும் என உறுதியாக தெரிவித்தது. ஆர்ப்பாட்டத்தில் திரண்ட மக்களையும் மிரட்டினர். அன்றே, டாஸ்மாக் கடை திறக்கக்கூடாது என வலியுறுத்தி உழைப்போர் உரிமை இயக்க தலைவர்களில் ஒருவரான தோழர் புகழ்வேந்தன் பட்டினிப் போராட்டம் துவங்கினார். பகுதி மக்கள் பேரணி, ஆர்ப்பாட்டம் நடத்தினர்.

ஜனவரி 16 வரை அரசு விடுமுறை என்பதால் டாஸ்மாக் கடை திறக்க நீதிமன்றத்தில் தடை பெறுவதற்கான முயற்சிகள் ஜனவரி 11 அன்று இரவு மற்றும் ஜனவரி 12 அன்று காலையும் மேற்கொள்ளப்பட்டன. ஜனவரி 24 வரை கடை திறக்க நீதிமன்ற தடை வழங்கப்பட்டுள்ளது.

ஜனவரி 12 அன்று மதுக்கடை ஒழிப்புக்கு ஆதரவான அனைத்து சக்திகளும் திரட்டப்பட்டன. அன்றே போராட்டத்தை விரிவாக்க மக்கள் ஆதரவு திரட்ட கையெழுத்து இயக்கம் துவங்கியது. ஜனவரி 13 மற்றும் 14 தேதிகளில் கையெழுத்து இயக்கம் நடத்தப்பட்டது. ஜனவரி 14 அன்று  உழைப்போர் உரிமை இயக்கத்தின் பகுதி பேரவை, நீதிமன்றத்தின் இடைக்கால தடை தாண்டி, சாராயக் கடையை இறுதியாக மூடுவது வரை போராடுவது என தீர்மானித்தது. 

குமரியில் குடிமனை கோரி கருத்தரங்கு

அமைப்புசாரா, அரை நகர்ப்புற ஏழைப் பெண்கள் வீடில்லாமல் தாங்கள் படும் வேதனைகளை தெரிவித்து அஇஅதிமுக தேர்தல் வாக்குறுதியில் சொன்னபடி வீட்டுமனையும், வீடும் வழங்கப்பட வேண்டும் என ஒருமித்து குரல் எழுப்பினர்.

டிசம்பர் 28 அன்று இகக(மாலெ) நாகர்கோவிலில் நடத்திய கருத்தரங்கில் 900 பேர், கிட்டத்தட்ட அனைவரும் பெண்கள் பங்கேற்றனர். கோரிக்கை நிறைவேற்றப்படாவிட்டால் ஜனவரி 26 முதல் காலவரையற்ற தொடர் கிளர்ச்சிகள் நடத்தப்படும் என கருத்தரங்கு முடிவு செய்தது.

கூட்டத்தில் பேசிய பலரும் அதிமுக அரசாங்கம் வீட்டுமனை மற்றும் வீட்டிற்கான மக்களின் பாத்தியப்பட்ட உரிமையை நிராகரித்துவிட்டு, பொது நிலங்களை சூறையாடுபவர்களையும்  நிலம் அபகரிப்பவர்களையும் ரியல் எஸ்டேட் கொள்ளையர்களையும் பாதுகாத்து வருகிறது என்று குற்றம் சாட்டினர்.

கூட்டத்தில் மாலெ கட்சி மாநிலச் செயலாளர் தோழர் பாலசுந்தரம், மாநில கமிட்டி உறுப்பினர்கள் தோழர்கள் சங்கரபாண்டியன், அந்தோணிமுத்து, மேரி ஸ்டெல்லா உரையாற்றினர். கருத்தரங்கை அடுத்து, ஜனவரி 6 அன்று முற்போக்கு பெண்கள் கழகத்தின் தலைமையில் வீடற்ற பெண்கள் ஆட்சியரை சந்தித்து வீட்டுமனை கோரி மனு அளித்தனர்.

பஞ்சமி நிலத்தை மீட்டு உரியவர்களுக்கு வழங்கு

காஞ்சிபுரம் மாவட்டம் வண்டலூரில் புறநகர் பேருந்து நிலையத் திட்டத்திற்காக விவசாய நிலத்தை கையகப்படுத்தும் தமிழக அரசின் முடிவு கைவிடப்பட வேண்டும், பஞ்சமி நிலமான கிரசென்ட் கல்லூரி நிலத்தை மீட்டு உரியவர்களுக்கு வழங்க வேண்டும் ஆகிய கோரிக்கைகளை வலியுறுத்தி டிசம்பர் 30 அன்று ஆட்சியர் அலுவலகம் முன்பு ஆர்ப்பாட்டம் நடத்தப்பட்டது. கட்சி மாநிலக் குழு உறுப்பினர் தோழர் இரணியப்பன் கண்டன உரையாற்றினார்.

புல்லாங்குழலும் கால் பந்தும்

தேடிச் சோறுநிதந் தின்று - பல
சின்னஞ் சிறுகதைகள் பேசி - மனம்
வாடித் துன்பமிக உழன்று - பிறர்
வாடப் பலசெயல்கள் செய்து - நரை
கூடிக் கிழப்பருவ மெய்தி - கொடுங்
கூற்றுக் கிரையெனப்பின் மாயும் - பல
வேடிக்கை மனிதரைப் போலே - நான்
வீழ்வே னென்று நினைத் தாயோ? 

- பாரதி

பாரதி நிச்சயமாக சின்னஞ்சிறு கதைகள் பேசும் ஜெயலலிதாவைப் பற்றி எழுதி இருக்க மாட்டான். அதேநேரம், தமிழக மக்கள், ஜெயலலிதா சொல்லும் குட்டிக்கதைகள் கேட்டு மெய்மறந்து வீழ்வார்கள் என்று ஜெயலலிதா நினைத்தால், அந்த நினைப்பில் மண் விழும்.

இலவச வேட்டி சேலைத் திட்டத்தால் 1.73 கோடி பெண்களும் 1.72 கோடி ஆண்களும், ஆக மொத்தம் 3.45 கோடி மக்கள் பயன் பெறுகிறார்கள் எனப் பெருமிதத்துடன் ஜெயலலிதா சொன்னார். அப்போதுதான், சின்னஞ்சிறு கதை ஒன்று சொன்னார். அவர் சொன்ன கதையை அவர் சொன்ன விதத்தில் வார்த்தை மாறாமல் வரி பிறழாமல் முதலில் பார்ப்போம்.

‘பொது நலன் என்பது புல்லாங்குழல் போன்றது. சுயநலம் என்பது கால் பந்து போன்றது. இவை இரண்டுமே காற்றால் இயங்குகின்றன. புல்லாங்குழல் முத்தமிடப்படுகிறது. கால் பந்து காலால் உதைக்கப்படுகிறது. தான் வாங்கிய காற்றை யாருக்கும் தராமல் தானே வைத்துக் கொள்வதால் கால் பந்து உதைபடுகிறது. தான் வாங்கிய காற்றை இசை வடிவில் மற்றவர்களுக்கு கொடுப்பதால் புல்லாங்குழல்  முத்தமிடப்படுகிறது.   
  
சுயநலமுள்ள மனிதர்கள் புறக்கணிக்கப்படுவார்கள். பொது நலம் உள்ள மனிதர்கள் போற்றப்படுவார்கள். என்னைப் பொறுத்தவரை ஒரே நலம்தான் உள்ளது. அது தமிழக மக்களின் நலம். அதனால்தான் மக்கள் எப்போதும் என் பக்கம் உள்ளார்கள். நானும் மக்கள் பக்கம் உள்ளேன்.’
ஜெயலலிதா, புல்லாங்குழலாய் தம்மை மக்கள் போற்றிப் புகழ்வார்கள், கருணாநிதி விஜயகாந்த் போன்றோரைக் கால் பந்து போல் உதைப்பார்கள் என நினைக்கிறார்.

உண்மையில், தமிழ்நாட்டு மக்களைக் கால் பந்து போல் கழகங்கள் மாறி மாறி உதைத்துக் கொண்டிருக்கிறார்கள். (காங்கிரஸ் கதை தமிழகத்தில் முடிந்த கதை என்பதால் அதன் ஆட்சிக் காலம் பற்றிப் பேச வேண்டியதில்லை). நேற்று கருணாநிதி துவங்கிய பல விசயங்களை, குறிப்பாக வசதி படைத்தவர்களுக்கு ஆதரவான சாமான்ய மக்களுக்கு எதிரான பல விசயங்களை, ஜெயலலிதா இன்று தொடர்கிறார். அதேபோல், நேற்று கருணாநிதியும், ஜெயலலிதா துவங்கியதைத்தான் தொடர்ந்தார்.

இரண்டு பேருமே, தமிழ்நாட்டு மக்கள், உழைத்துப் பிழைத்து சொந்த வருமானத்தில் வாழ முடியாது என நம்பினார்கள். நம்புகிறார்கள். முதலாளித்துவம், கவுரவமாக வாழ மக்களுக்கு வருமானம் தராது என்பதால்தான், முதலாளிகளுக்கு மேட்டுக்குடியினருக்கு, தமிழக வளங்களை கருவூலத்தைச் சூறையாட மக்கள் உழைப்பைச் சுரண்ட வாய்ப்பு தந்தவர்கள், மக்கள் சீற்றத்தைத் தணிக்க கட்டணம்/விலை இல்லா, மலிவு கட்டணத்தில்/விலையில் பொருட்கள், சேவைகள் வழங்குகிறார்கள். நிலம், வீடு, வருமானம், கவுரவம், சுதந்திரம், ஜனநாயகம் தவிர்த்து, சின்னச்சின்ன விஷயங்களை அரண்மனை உப்பரிகையிலிருந்து வீசி எறிய, மக்கள் பொறுக்கிக் கொள்வார்கள் என ஜெயலலிதா நினைக்கிறார்.

மக்களுக்குப் பாத்யதைப்பட்டதில், ஒரு சிறு பகுதி, எந்த விதத்தில் எப்படி மக்களிடம் வந்தாலும், மக்கள் அதைப் பெற்றுக் கொள்ளட்டும். பெற்றுக் கொள்கிற மக்களை நாம் கவுரவக் குறைவாகப் பார்ப்பதில்லை. தமிழ்நாட்டின் கோடிக்கணக்கான மக்கள் அரிசி, வேட்டி சேலை போன்றவை கூட வாங்க முடியாத நிலையில் இருப்பது அப்பட்டமாகத் தெரிகிறது.

ஆனால் தமிழ்நாட்டு மக்களை வெறும் பயனாளிகளாக மாற்றும் முயற்சிக்கும், வறியவர் சார்பு மத்திய அரசு விரோத முகமூடி அணியும் ஜெயலலிதா அரசிற்கும் எதிராக, மக்களைத் திரட்ட வேண்டும் என்கிறோம். கருணாநிதி, விஜயகாந்த் இன்றளவில், இன்றைய நிலையில் ஜெயலலிதாவிற்கு வலு சேர்க்கிறார்கள். காங்கிரசும் பாஜகவும் போட்டியாளர்கள் அல்ல. பாஜக வருங்காலக் கூட்டாளியாகும் உள்ளாற்றல் கொண்டது.

தமிழ்நாட்டின் பெரும்பான்மை மக்களை கால் பந்தாக உதைத்துக் கொண்டிருக்கிறார் ஜெயலலிதா. தலித்துகள், இஸ்லாமியர்கள், அணு உலை எதிர்ப்போர், உண்மையான ஜனநாயக சக்திகள், உழைப்பாளிகள் அனைவரும் கால்பந்தாக உதைக்கப்படுகிறார்கள். மக்களின் செவியையும் சிந்தையையும் குளிர வைப்பவர் ஜெயலலிதா என உண்மையான இடதுசாரி ஜனநாயக மதச்சார்பற்ற சக்தி எவரும், கருத முடியாது.

கொலை வாளினை எடடா பெரும் கொடியோர் செயல் அறவே என எழுதிய  பாரதிதாசனின் பின்வரும் கவிதை வரிகளை தமிழ்நாட்டின் போராட்ட இயக்கங்கள் தம் பதாகைகளில் பொறிக்கட்டும்.

ஓடப்பராயிருக்கும் ஏழையப்பர்
உதையப்பர் ஆகிவிட்டால் ஓர் நொடிக்குள்
ஓடப்பர் உயரப்பர் எல்லாம் மாறி
ஒப்பப்பர் ஆய்விடுவார் உணரப்பா நீ

திருபெரும்புதூரில் திருவிழா

மூலதனம் குவிந்துள்ள திருபெரும்புதூரில் இளம்தொழிலாளர்கள் நலன்களை பாதுகாக்க புரட்சிகர இளைஞர் கழகம் 1 லட்சம் கையெழுத்து இயக்கம் நடத்துகிறது.

பயிற்சியாளர் நலன் காக்கும் திருத்த மசோதா 47/2008க்கு குடியரசு தலைவர் ஒப்புதல் வேண்டும், தொழிற்சங்க அங்கீகார திருத்தச் சட்டம் வேண்டும், ஒப்பந்தத் தொழிலாளர் உரிமைகள் பாதுகாக்கப்பட வேண்டும், பணியிட விபத்துக்கள் தடுக்கப்பட வேண்டும், திருபெரும்புதூர் தொழிலாளர்களுக்கு அனைத்து வசதிகளும் கொண்ட தங்கும் விடுதிகள் வேண்டும் போன்ற கோரிக்கைகள் கையெழுத்து இயக்கத்தில் எழுப்பப்பட்டுள்ளன. இது வரை 35,000 கையெழுத்துக்கள் பெறப்பட்டுள்ளன. பகுதி தொழிலாளர் மத்தியில் ரூ.40,000 வரை வசூல் செய்யப்பட்டுள்ளது.

இயக்கத்தின் ஒரு பகுதியாக ஜனவரி 6 அன்று திருபெரும்புதூரில் பொதுக்கூட்டம் நடத்தப்பட்டது. ஏசியன் பெயின்ட்ஸ், ஹ÷ண்டாய், சிஅண்டுஎப், டென்னக்கோ, மியாங்கோ என 15க்கும் மேற்பட்ட ஆலைகளின் 200க்கும் மேற்பட்ட தொழிலாளர்கள் கூட்டத்தில் கலந்து கொண்டனர்.

25 நாட்களுக்கும் மேலாக வேலை நிறுத்தப் போராட்டம் நடத்தி வருகின்ற ஏசியன் பெயின்ட்ஸ் தொழிலாளர்கள் தங்கள் போர்க்குணமிக்க, புதிய வகை முழக்கங்களால் கூட்டத்தை உயிர்ப்புடன் வைத்திருப்பதில் பெரும்பங்காற்றினர்.

ஏசியன் பெயின்ட்ஸ் தோழர்கள் குணசேகரன் உள்ளிட்ட 6 பேர் கவிதைகள், பாடல்கள் பாடினார்கள். கூட்டத்திற்கு பகுதியின் புரட்சிகர இளைஞர் கழக மாநில பொறுப்பாளர்களில் ஒருவரான தோழர் ராஜகுரு தலைமை தாங்கினார். மாலெ கட்சியின் அரசியல் தலைமைக் குழு உறுப்பினர் தோழர் எஸ்.குமாரசாமி சிறப்புரையாற்றினார்.

ஆர்ஒய்ஏ தேசிய செயலாளர் தோழர் கே.பாரதி, கட்சியின் மாநிலக் கமிட்டி உறுப்பினர் சொ.இரணியப்பன்,சென்னை மாவட்ட செயலாளர் எஸ்.சேகர், ஏஅய்சிசிடியு மாநில செயலாளர் தோழர் க.பழனிவேல், முற்போக்கு பெண்கள் கழக தோழர் விஜயா, ஹுண்டாய் தோழர் ராஜவேலு ஆகியோர் கூட்டத்தில் உரையாற்றினர்.

சட்டமன்றத்தின் அருகில் தொழிலாளர் போராட்டம்

சென்னையில் சட்டமன்றத்தின் அருகில் இயங்கும் ஜிம்கானா கிளப் தொழிலாளர்கள் 40 நாட்களுக்கு மேலாக வேலை நிறுத்தப் போராட்டம் நடத்தி வருகின்றனர். புத்தாண்டு, பொங்கல் அனைத்தும் வேலை நிறுத்தப் போராட்டத்தின் ஊடேதான் அவர்களுக்கு கடந்து சென்றன. ஜனவரி 9 அன்று சங்கத்தின் தலைவர்கள் தோழர்கள் ஜேம்ஸ், உசேன் காலவரையரையற்ற பட்டினிப் போராட்டம் துவங்கினர். ஜனவரி 10 அன்று அரசு தரப்பில் பேச்சுவார்த்தை நடத்தி தீர்வு காணவும் வேலை நிறுத்தத்தைக் கைவிடவும் வலியுறுத்தப்பட்டது. அதிகாரிகள் கேட்டுக் கொண்டதற்கேற்ப உண்ணாவிரதப் போராட்டம் முடித்துக்கொள்ளப்பட்டது. வேலை நிறுத்தப் போராட்டம் தொடர்கிறது.

இந்தியாவில் இசுலாமியர்களுக்கு இடம் இல்லையா? - எஸ்.குமாரசாமி

முசாபர்நகர். மதச்சார்பற்றவர் என, இகக, இககமா தோழர்களின் தரச் சான்றிதழ் பெற்ற முலாயம் கட்சி ஆட்சி நடக்கும் உத்தரபிரதேசத்தில்தான், முசாபர்நகர் நடந்தது. முலாயமின் மதச்சார்பின்மை, அவரது சிறுபான்மையினர் சார்பு நிலை அவரை ‘மவுலானா’  முலாயம் என்று அழைக்கும் நிலைக்குச் சென்றது என்றார்கள்.

முசாபர்நகர், முலாயம் சாயத்தை வெளுக்க வைத்துவிட்டது. இந்திய பாணி மதச்சார்பின்மை எப்போது வேண்டுமானாலும் மதவெறியின் பக்கம் சாயும் என்பதை மீண்டும் ஒருமுறை அக்கறையுள்ள இடதுசாரிகளுக்கு கவனப்படுத்துகிறது.

முசாபர்நகர், பாக்பத், சாம்லி, மீரத் மாவட்டங்களில், இந்த முறை சங்பரிவார் கூட்டம், ஜாட் ஜாதியினரை இசுலாமிய வேட்டையில் ஈடுபடுத்துவதில் வெற்றி பெற்றது. பல பத்தாண்டுகளாக, வட இந்தியாவில் சங்பரிவார் மதவெறி அரசியல் தலைவிரித்தாடி வரும் போதும், ஜாட் சாதியினருக்கும் இசுலாமியருக்கும் மோதல்கள் நடந்ததில்லை. இசுலாமியர்கள் ‘காதல் புனிதப் போர்’ தொடுக்கிறார்கள் எனத் திட்டமிட்டு சங்பரிவார் துவக்கிய பிரச்சாரம், 2013ல்தான் நூற்றுக்கும் மேற்பட்டவர்களின் படுகொலையில் முடிந்தது.

மறுபுறம் பாஜகவின் வாக்கு வங்கி நிறைந்தது. ராஜஸ்தான் மற்றும் டெல்லியில் ஜாட் வாக்குகள் பாஜகவுக்குக் குவிந்தன. கலவரம் நடந்திராவிடில், டெல்லி சட்டமன்றத் தேர்தல்களில், பாஜக எண்ணிக்கை இன்னமும் குறைந்திருக்கும். இசுலாமிய வேட்டை. வாக்கு அறுவடை.

செப்டம்பர் அக்டோபரில், சொந்த மண்ணில் இசுலாமியர்கள் 40 ஆயிரம் பேர் வரை அகதிகள் ஆக்கப்பட்டார்கள். நிவாரண முகாம்களில் என்ன நடந்தது? என்ன நடக்கிறது? இசுலாமியர்களிடம் நீங்கள் திரும்பவும் சொந்த ஊருக்குப் போக மாட்டேன் என உறுதிமொழி தந்தால் ரூ.5 லட்சம் நிவாரணம் தருகிறேன் என்றார் முலாயம்.

 இசுலாமிய சொத்துக்கள், வாழிடம், வாழ்ந்த கலாச்சாரம் எல்லாமே பறிபோகும். சிங்களப் பேரினவாதம் தமிழர்களுக்குச் செய்ததை, சங்பரிவார் இந்தியாவில் செய்து கொண்டிருக்கிறது. இந்த வேட்டைக்கு, துணை போய் காவல் நிற்பவர்கள், முலாயம் வகையறாக்கள். இந்த வரிசையில், சங்பரிவாருடன், வைகோ, ராமதாஸ், விஜயகாந்த் சேர வேண்டும் எனத் தமிழ்நாட்டில் முயற்சிகள் நடக்கின்றன.

செப்டம்பர் 7 முதல் டிசம்பர் 20 வரை முகாம்களில் இருந்தவர்களில் குழந்தைகள் உட்பட 34 பேர் இறந்ததாக முலாயம் ஒப்புதல் வாக்குமூலம் தருகிறார். உத்தரப்பிரதேச தலைமைச் செயலாளர் குப்தா, குளிரால் யாரும் சாவார்களா, சைபீரியாவில் மக்கள் வாழவில்லையா என்று கேட்டு, ரொட்டி இல்லை என்றால் கேக் சாப்பிடுங்கள் என்று சொன்ன பிரெஞ்சு மகாராணி மேரி ஆன்டனெட்டை நமக்கு நினைவுபடுத்துகிறார்.

முசாபர்நகருக்கு முன்னோடி நிச்சயம் குஜராத்தான். 2002ல் நரேந்திரமோடி தலைமையில் குஜராத்தில் ஆயிரங்களில் இசுலாமியர்கள் கொல்லப்பட்ட பிறகு, 1,68,000 இசுலாமியர்கள் வாழுமிடங்களில் இருந்து வெளியேற்றப்பட்டனர்.

நிவாரண முகாம்கள் மனிதர் வாழத் தகுதியற்றவையாக இருந்தன. சாகடித்தாய், பின்னர் தப்பிப் பிழைத்திருப்பவர்களைச் செத்து இருக்கலாமே என நினைக்க வைக்கிறாயே, என்ன அநியாயம் என நாடே கேள்வி எழுப்பியது.

மோடி பதில் சொன்னார். எங்கே எப்போது என்ன பதில் சொன்னார் தெரியுமா? குஜராத்தில், மெசானாவின் கோவில் நகரமான டெக்கார்ஜியில் தேர்தல் பிரச்சாரத்தைத் துவக்கியபோது, செப்டம்பர் 9, 2002 அன்று நரேந்திரமோடி, நிவாரண முகாம்கள் குழந்தைகள் உற்பத்தி செய்யும் தொழிற்சாலைகள் என்றார்.

இப்போது முலாயம், முகாம்களில் பாதிக்கப்பட்டவர்கள் யாருமில்லை, கேள்வி கேட்கும் மாற்றுக் கட்சியினரே உள்ளனர் என்கிறார். உச்சநீதிமன்றத் தலையீட்டிற்குப் பிறகும், முகாம்களில் தங்கி இருந்தவர்களை வெளியேற்றி, அந்த இடங்களைப் புல்டோசர்களால் தரைமட்டமாக்குகின்றனர்.

பாதிக்கப்பட்டவர்கள் மீது, அவர்களுக்கு நிவாரணமோ மறு வாழ்க்கையோ அளிக்காத முலாயம் கட்சி அரசாங்கம், வன நிலங்களை ஆக்கிரமிப்பு செய்ததாக வழக்கு போட்டது.

பாப்ரி மசூதி இடிக்கப்பட்டபோது வேடிக்கை பார்த்த மத்திய காங்கிரஸ் அரசுதான், அன்று மசூதி இடிப்புக்குத் துணை போனது. இன்றும், பாதிக்கப்பட்டவர்கள் மீது பாலியல் வன்கொடுமைகள், தாக்குதல்கள், நிவாரணம், மறுவாழ்க்கை மறுப்பு நிகழும் போதும், மன்மோகன் தலைமையிலான மத்திய அரசு மவுனம் சாதிப்பதன் மூலம் மதவாத சக்திகளை ஊக்குவிக்கிறது.

ரோமாபுரி எரிந்தபோது நீரோ மன்னன் பிடில் வாசித்தானாம். இசுலாமிய மக்கள் மீளாத்துயரில் சிக்கி இருக்கும்போது, உத்தர பிரதேச அமைச்சர்களின் தலைமையில், சமாஜ்வாதி கட்சி, பாஜக, அஜித் சிங்கின் ஆர்எல்டி கட்சி சட்டமன்ற உறுப்பினர்கள், துருக்கி, கிரீஸ், நெதர்லாந்து, இங்கிலாந்து, அய்க்கிய அரபு குடியரசு போன்ற நாடுகளுக்கு கல்வி ‘சுற்றுலா’ செல்கிறார்கள். முலாயம் மற்றும் அகிலேஷின் சொந்த மாவட்டமான எட்டாவாவில், செஃபாய் மஹோத்சவ் கொண்டாட்டம் ஏற்பாடு செய்யப்பட்டு பாலிவுட் நட்சத்திரங்கள் சல்மான்கான், மாதுரி தீட்சித் ஆடிப்பாடிச் சென்றுள்ளனர்.

உத்தரபிரதேசத்தில் நிலவரம் கலவரமாக இருக்கும்போது டெல்லி தலைநகர் மண்டலத்தில் என்ன வாழ்கிறது? ஆம் ஆத்மி கட்சித் தலைவர்களில் ஒருவரான பிரசாந்த் பூஷன், காஷ்மீரில் இராணுவம் இருக்கலாமா வேண்டாமா என்பதில் காஷ்மீர் மக்களிடம் கருத்துக் கணிப்பு நடத்த வேண்டும் என்றார். தேச விரோத மக்கள் விரோத தேச பக்தர்கள் கூப்பாடு போட, பிரசாந்த் பூஷன் காஷ்மீர் இந்தியாவின் பிரிக்க முடியாத பகுதி எனவும், டெல்லி முதல்வர் அரவிந்த் கெஜ்ரிவால், ராணுவ விவகாரங்களில் ராணுவமே பார்த்துக் கொள்ளும் எனவும் சொல்லிப் பின்வாங்க நேர்ந்தது. அதற்குப் பிறகும், ஆம் ஆத்மி கட்சியின் கவுசாம்பி அலுவலகம் இந்து ரக்ஷா தள் என்ற சங்பரிவார் அமைப்பால் சூறையாடப்பட்டது.

தமிழகத்தின் நிலைமை என்ன? பொய் வழக்குகள். சிறையிலடைப்பு. சமூக பொருளாதார வாழ்வில் தொடர் புறக்கணிப்பு. ஓரஞ்சார விளிம்புகளுக்கு விரட்டப்படுதல். சென்னையில் ஏழை இசுலாமிய சிறுவன் தமீம் அன்சாரிக்கு நேர்ந்த கதி, ஒரு பானை சோற்றுக்கு ஒரு சோறு பதம் எனப் பொருத்திப் பார்க்க உதவும்.   
    
மூன்று வருடங்களுக்கு முன்பு இறந்த முகம்மது ஹனிபா மற்றும் ஷபீனா பேகத்தினுடைய மகன் தமீம் அன்சாரி. முகம்மது ஹனிபா ஆட்டோ ஓட்டி வாழ்ந்து மடிந்தவர். ஷபீனா பேகம் ஓர் உணவகத்தில் பாத்திரம் கழுவுவதோடு கிடைத்த வீட்டு வேலைகளைச் செய்பவர். ஒற்றையறை வாடகை வீட்டில் மாற்றுத் திறனாளியான ஒரு சகோதரியும் தமீம் அன்சாரிக்கு இருக்கிறார். தமீம் அன்சாரிக்கு வயது 16. தமீம் அன்சாரி ஒரு பாவம் அல்ல, இரு பாவங்கள் செய்துள்ளார். முதல் பாவம் அவர் ஏழைக் குடும்பத்தில் பிறந்தது. இரண்டாவது பாவம் அவர் இசுலாமிய சமூகத்தைச் சேர்ந்தவர் என்பது.

கோவில் உண்டி திருட்டு சம்பந்தமாக இவரை நீலாங்கரை காவல் நிலையத்தைச் சேர்ந்தவர்கள் பிடித்துச் சென்றார்கள். காவல் ஆய்வாளர் புஷ்பராஜூக்கு சிறுவன் அன்சாரி எல்லை தாண்டிய பயங்கரவாதியாகக் காட்சியளித்துள்ளான். அவர் சொல்லும் குற்றங்களை ஒப்புக்கொள்ளச் சொல்லி அன்சாரியின் வாய்க்குள் துப்பாக்கியை வைத்து மிரட்டினார் எனவும் அப்போது குண்டு வெடித்தது எனவும் சொல்லப்படுகிறது. ஆபத்தான நிலையில் அந்த சிறுவன் சோழிங்கநல்லூரிலுள்ள ஒரு தனியார் மருத்துவமனையில் உயிருக்குப் போராடிக் கொண்டிருக்கிறான்.

காவல் ஆய்வாளர் புஷ்பராஜ், கவனக் குறைவாக நடந்து கொண்டார் என்று சுலபமாகச் சொல்லி தப்பிக்க விடக்கூடாது. சிறுவனை இவர் சிறுவர் நீதி வாரியம் முன்பு ஆஜர்படுத்தியிருக்க வேண்டும். காவல் ஆய்வாளர் புஷ்பராஜ் அன்சாரியின் வாயில் துப்பாக்கியை வைத்தது குற்றம். ஒப்புதல் வாக்கு மூலத்தை மிரட்டிப் பெறப் பார்த்தது குற்றம். துப்பாக்கியால் சுட்டது குற்றம்.
பெண்கள் விசயத்தில் நாடு முழுவதும் ஏற்பட்டுள்ள கூருணர்வால் தருண்தேஜ்பால் இன்னமும் சிறையில் இருக்கிறார். காவல் ஆய்வாளர் புஷ்பராஜ் ஏழை இசுலாமிய சிறுவனை சுட்டதற்காக சிறையிலடைக்கப்பட வேண்டும். தற்காலிகப் பணிநீக்கம் செய்யப்பட வேண்டும்.

தலைப்பில் உள்ள கேள்வியை, அதாவது, இந்தியாவில் இசுலாமியர்களுக்கு இடமில்லையா என்ற கேள்வியை எப்படி அணுகுவது? இசுலாமியர்க்கு இந்தியாவில் இடம் இல்லை என்பவர்கள்தான், பழங்குடியின மக்களுக்கு வனங்கள் சொந்தம் இல்லை, தலித்துகளுக்கு கவுரவம் சமத்துவம் மீது உரிமை இல்லை, விவசாயிகளுக்கு விவசாய நிலங்களின்மீது உரிமை இல்லை, தொழிலாளர்களுக்கு நியாயமான கூலி வேலை பணிப்பாதுகாப்பு சங்க உரிமை இல்லை என்கிறார்கள்.

சுரண்டப்படுபவர்கள் ஒடுக்கப்படுபவர்கள், சாதி மொழி இன மத எல்லைகள் தாண்டி, பண மூட்டைகளுக்கு, ஊழல் பெருச்சாளிகளுக்கு, மதவெறியர்களுக்கு, ஆதிக்க சக்திகளுக்கு இந்தியா இல்லை தமிழ்நாடு இல்லை என, உரத்துக் குரல் கொடுக்க வேண்டும். தனித்தனி சிறுபான்மைகள், கரம் கோர்த்தால் பெரும்பான்மை.  அடையாள அடிப்படையிலான இயக்கங்கள், தனிப்பிரச்னைகள் மீதான இயக்கங்கள், அனைத்தும் தழுவிய விதத்திலான விடாப்பிடியான  இடதுசாரி ஜனநாயக இயக்கங்களுடன் இணைந்து களம் கண்டால், காலம் மாறும்.

சீனப் புரட்சி மற்றும் அது தரும் பாடங்கள் பற்றிய ஒரு சுருக்கமான சித்திரம் - டி.பி.பக்ஷி

சீனப் புரட்சியின் முக்கிய கட்டங்களும் முக்கிய இயல்புகளும்

ஜப்பானிய ஆக்கிரமிப்பாளர்களை தோற்கடித்த பிறகு, இன்னுமொரு சிவில் யுத்தம் அல்லது ஒப்பீட்டளவில் புதிய ஜனநாயக புரட்சியை நிறைவு செய்ய அமைதிகரமான மாற்றத்திற்கான வாய்ப்பு என்ற புதிய சூழல் சீனப் புரட்சியின் இயக்கப்போக்கில் கருத்தரித்திருந்தது.

இரண்டாவது சிவில் யுத்தம் மற்றும் ஜப்பான் எதிர்ப்பு தடுப்பு யுத்தம் ஆகிய கிட்டத்தட்ட 18 ஆண்டுகால தொடர்ச்சியான மோதல்களினால் சீன மக்கள் களைப்புற்றிருந்ததை சீனக் கம்யூனிஸ்ட் கட்சியால் படித்தறிய முடிந்தது. இயல்பாக, அவர்கள் தங்கள் ஆழ் மனதிலிருந்து, அமைதியை விரும்பினார்கள். ஆனால், நிஜ வாழ்க்கையில் சீனப் புரட்சி, அமைதியை நாடுவதற்கான முயற்சி மற்றும் திணிக்கப்பட்ட மோகங்கள் என்ற வகைமாதிரியில்தான் முன்சென்றது. இந்த மாற்றங்களின் சித்திரத்தை நாம் பார்ப்போம்.

ஜப்பான் ஏகாதிபத்தியம் சீனத்தில் சரணடைந்தது, இரண்டாவது உலக யுத்தத்தை முடிவுக்குக் கொண்டு வந்து உலக சூழலில் புதிய முன்முயற்சியை துவக்கவும் பங்களிப்பு செய்தது. ஏகாதிபத்திய சக்திகளான ஜெர்மனி, இத்தாலி மற்றும் ஜப்பான் ஆகியவை தோற்கடிக்கப்பட்டது, எழுந்து வரும் சூழலின் முக்கிய கட்டங்களை குறித்தன: பிரிட்டன் மற்றும் பிரான்ஸ் வலுவிழந்ததும் மற்றும் உலக தலைமையை அய்க்கிய அமெரிக்கா கைப்பற்றிக் கொண்டதும், சோவியத் யூனியனின் மிகப் பெரிய வெற்றி மற்றும் கிழக்கு அய்ரோப்பிய நாடுகளில் மக்களின் ஜனநாயக அரசுகள் எழுந்து வந்ததும் அவை முதலாளித்துவ முகாமிற்கு செல்லாமல், உலக அளவில் பரந்த சோசலிச முகாமை உருவாக்க சோவியத் யூனியனோடு கரம் கோர்க்க விரும்பியது.

வெளிப்படையாக புலப்படும், புதிய யுத்த அச்சுறுத்தலுக்கு எதிரான அமைதிக்கான இயக்கம், அய்க்கிய அமெரிக்க தாக்குதலின் இயக்கப் போக்கான மறுகாலனியம் மற்றும் நவீன காலனியம் ஆகியவற்றுக்கு எதிராக பின்தங்கிய ஆசிய, லத்தீன் அமெரிக்க மற்றும் ஆப்பிரிக்க நாடுகளில் வளர்ந்துவரும் தேச விடுதலை இயக்கம் ஆகியவை உலகின் வளர்ந்து வரும் சூழலை குறிப்பதாக இருந்தன.

இந்த மாற்றங்கள், உள்ளூர் பிற்போக்கு சக்திகள் மற்றும் அய்க்கிய அமெரிக்க ஏகாதிபத்தியத்தின் தலையீடு ஆகியவற்றுக்கு எதிராக சீனமக்கள் புரட்சிகர போராட்டங்களை நடத்துவதற்கான தகுந்த சூழலை உருவாக்கவும் பங்களிப்பு செய்தன.

ஜப்பான் எதிர்ப்பு யுத்த காலத்தில், பரந்த அய்க்கிய முன்னணி, குறிப்பாக, சியாங் கே ஷெக் தலைமையிலான குவாமின்டாங் மற்றும் கம்யூனிஸ்டுகளுக்கு இடையிலான ஒத்துழைப்பு  என்பது ஒருபோதும் எளிமையானதாக இருந்ததில்லை. சியாங் கே ஷெக் தரப்பிலான அறிவிக்கப்படாத முரண்பாடுகளையும் உள்ளடக்கிய ஒத்துழையாமை மற்றும் சிதைவுக்குள்ளாக்கும் நடவடிக்கைகள் ஆகிய போக்குகள் அவ்வப்போது குழப்பமான சூழலை உருவாக்கின.

ஜப்பான் தோல்வியடைந்ததும், ஜப்பான் ராணுவம் சரணடைந்ததும் கம்யூனிஸ்டுகளோடு ஒப்பிடும்போது சியாங் கேஷெக் தன் நிலையை உறுதிபடுத்திக் கொள்ள வாய்ப்பு வழங்கி, சீனக் கம்யூனிஸ்ட் கட்சி தலைமையிலான சிவப்புப் படையை அப்புறப்படுத்த இன்னொரு சிவில் யுத்தத்திற்கு செல்ல உதவியது.

மோதல்கள் ஒரு புறம் இருந்தால் கூட, கம்யூனிஸ்ட் தலைமையிலான சக்திகளோடு ஒப்பிடும்போது, சியாங் கே ஷெக் தலைமையிலான குவாமின்டாங்குக்கு ஆதாயம் எனும்போது ஜப்பானிய சக்திகள் அதைப் பெரிதாக பொருட்படுத்தவில்லை. மிக முக்கியமாக, சியாங் கே ஷெக் தலைமையிலான பிற்போக்கு குவாமின்டாங்கை நம்பக மான கூட்டாளியாக வைத்து, ஆசியாவில் சீனா போன்ற மிகப்பெரிய நாட்டில், அமெரிக்க ஏகாதிபத்தியம் தன் நிலையை உறுதிபடுத்திக் கொள்வதில் மிகுந்த அக்கறை கொண்டிருந்தது. ஜப்பான் எதிர்ப்பு யுத்தத்திற்குப் பிறகு, சீனத்தில் கம்யூனிசம் உறுதிப்படுவதிலும், வளர்வதிலும் மிகப்பெரிய அச்சுறுத்தல் உட்பொதிந்திருந்திருக்கிறது என்பதை நன்றாக அறிந்த அய்க்கிய அமெரிக்கா, அதைப் பலவீனப்படுத்தி, சீனாவிலிருந்து கம்யூனிச செல்வாக்கை துடைத்தெறிவது என்பதை, போருக்கு பின்னாலான உலக போர்த்தந்திரத்தின் பகுதியாக கொண்டிருந்தது.

பரந்த சீன மக்களின் அபிலாசைகள் மற்றும் மனநிலைக்கேற்ப ஜப்பான் எதிர்ப்புப் போருக்கு பிந்தைய சீனச் சூழலில் ‘அமைதி மற்றும் ஜனநாயகம்’ என்னும் பதாகையை உயர்த்திப் பிடிப்பது என்ற முடிவை சீனக் கம்யூனிஸ்ட் கட்சி எடுத்தது. அமைதி, ஜனநாயகம் மற்றும் ஒருமைப்பாடு அடிப்படையில் ஒட்டுமொத்த நாட்டின் மொத்த ஒற்றுமைக்கு உரத்த அழைப்பு விடுத்தது. புதிய சிவில் யுத்தத்திற்கான வாய்ப்புகளை தவிர்க்கவும் அது பரிந்துரைத்தது.
இந்த அறிவிப்புகளை சாத்தியமாக்க ஆகஸ்ட் 28, 1945 அன்று சியாங் கே ஷெக் தலைமையிலான குவாமின்டாங்கோடு பேச்சு வார்த்தை நடத்த தோழர் மாவோ சுங்சிங் வந்தார். பேச்சுவார்த்தைகள் 40 நாட்கள் நீடித்தன. இறுதியாக பேச்சுவார்த்தை ஒப்பந்தத்தில் முடிவடைந்து அக்டோபர் 10, 1945 அன்று சீன கம்யூனிஸ்ட் கட்சி மற்றும் குவாமின்டாங் பிரதிநிதிகள் கையொப்பமிட்டனர்.

வரலாற்றுச் சிறப்புமிக்க, 10 அக்டோபர் ஒப்பந்தம் என விமரிசையாக அழைக்கப்பட்ட அந்த ஒப்பந்தம், சிவில் யுத்தத்தை நிராகரிப்பது, அமைதி, ஜனநாயகம், ஒருமைப்பாடு மற்றும் ஒற்றுமையின் அடிப்படையிலான சுயாதிபத்திய, விடுவிக்கப்பட்ட, வளமான சக்தி வாய்ந்த சீனத்தை உருவாக்குவது என நிபந்தனை விதித்தது. உள்நாட்டு அமைதியை பராமரிக்க பொறியமைவு ஏற்படுத்துவதென்றும் அமைதிகரமான வழியில் நாட்டை புனர்நிர்மாணம் செய்வது பற்றி விவாதிக்க அரசியல் கலந்தாய்வு மாநாடுகளை கூட்டுவதென்றும் ஒத்துக் கொள்ளப்பட்டது. ஆயுத படைகளுக்கு பாதுகாப்பு வழிகளை எற்படுத்திக் கொடுக்க குவாமின்டாங்குக்கு சிறப்பு சலுகை வழங்க சீன கம்யூனிஸ்ட் கட்சி ஏற்றுக்கொண்டதோடு, 13 லட்சம் ஆயுதப் படைகளை கொண்ட மக்கள் விடுதலை படையின் 24 பிரிவுகளை மறு அமைப்பாக்கம் செய்து கொள்ளவும் சீன கம்யூனிஸ்ட் கட்சி ஒப்புக் கொண்டது.

சீன கம்யூனிஸ்ட் கட்சி ஒப்பந்தத்தை அமல்படுத்துவதில் தனக்குள்ள கடப்பாட்டை உண்மையான உணர்வில் காண்பித்தது. முரணான விதத்தில், சியாங்கே ஷெக்கால் தலைமை தாங்கப்படும் குவாமின்டாங் துவக்கத்திலிருந்தே சிவில் யுத்தத்தை துவக்குவதற்கான மூடுதிரையாக ஒப்பந்தத்தை பயன்படுத்த முயற்சித்தது.

அய்முகூ ஆட்சியாளர்களை வரலாறு மன்னிக்காது - ஜி.ரமேஷ்

தனது இரண்டாவது ஆட்சி காலத்தில் மூன்றாவது முறையாக ஜனவரி 3 அன்று பத்திரிகையாளர்களை சந்தித்த பிரதமர் மன்மோகன், வரலாறு தன்னிடம் கனிவு காட்டும் என்றார். வரலாறு மட்டுமல்ல, சர்வதேச மற்றும் தேசிய பூகோளம், பொருளாதாரம், கணிதம், அறிவியல், சமூகவியல், மொழியியல் என எதுவும் மன்மோகனையும் அவரது தலைமையிலான அய்முகூ ஆட்சிகளையும் மன்னிக்காது.

சாமான்ய மக்கள் ஓட்டாண்டிகளாக்கப்பட்டு, அவர்களிடம் இருந்ததும் பறிக்கப்பட்டு, அதன் மூலம் கார்ப்பரேட் நிறுவனங்கள் லாபம் சேர்க்க உறுதுணையாய் இன்று வரை நின்றவரை, யாரும் மன்னிக்க முடியாது. நாட்டின் ஏகாதிபத்திய எதிர்ப்பு மரபை, ஏகாதிபத்திய எதிர்ப்பு வரலாற்றை களங்கப்படுத்தியவரை யாரும் மன்னிக்க முடியாது.

மன்மோகனின் பணிஓய்வு அறிவிப்பு வெளியான பத்திரிகையாளர் சந்திப்புக்கு முன்னும் பின்னும், சட்டமன்ற தேர்தல்களில் மக்கள் தங்கள் சீற்றத்தை போதுமான அளவு தெளிவாக வெளிப்படுத்தியபோதும், கார்ப்பரேட் ஆதரவு நடவடிக்கைகள் மளமளவென நிறைவேறுகின்றன. திடீரென ஜெயந்தி நடராஜன் சுற்றுச் சூழல் அமைச்சரானார். பின் திடீரென பதவி விலகினார். திடீரென வீரப்பமொய்லி அந்த அமைச்சக பொறுப்பேற்றார். திடீரென போஸ்கோவுக்கு அனுமதி கிடைத்துவிட்டது. மான்ய விலை சிலிண்டர் ஒன்பதா பன்னிரண்டா என்று மத்திய அரசிடம் பேரம்பேசும் வீரப்பமொய்லி, கூடுதல் பதவி ஏற்ற 17 நாட்களில் ரூ.1.5 லட்சம் கோடி மதிப்பிலான திட்டங்களுக்கு அனுமதி கொடுத்துவிட்டார்.

மறுபக்கம், நிலக்கரிச் சுரங்க ஒதுக்கீட்டில் சுற்றுச்சூழல் அனுமதி பெறாத சுரங்க ஒதுக்கீடுகளை உச்சநீதிமன்றம் ரத்து செய்யச் சொன்னது. ரூ.2 லட்சம் கோடி வரை முதலீடு செய்யப்பட்டுள்ளது என்ற வாதம் வந்தபோது, எவ்வளவு பெரிய முதலீடு என்றாலும் சுற்றுச்சூழல் அனுமதி பெறாமல் முதலீடு செய்தது அவர்கள் பிரச்சனை, அதன் விளைவுகளை அவர்கள் எதிர்கொள்ளத்தான் வேண்டும் என்றது.

“நிலக்கரி ஒதுக்கீட்டில்  தவறு நடந்துள்ளது என்பதை நான் ஒப்புக்கொள்கிறேன். நல்ல நம்பிக்கையியோடுதான் நாங்கள் முடிவுகள் எடுக்கிறோம். ஆனால், எப்படியோ அது தவறாகப் போய்விடுகிறது. நிலக்கரிச் சுரங்க ஒதுக்கீட்டில் மத்திய அரசு இன்னும் சிறந்த முறையைக் கடைபிடித்திருக்கலாம்.” என்று உச்சநீதி மன்றத்தில் மத்திய அரசின் சார்பாக ஆஜராகும் அட்டர்னி ஜெனரல் கூலம் இ.வாஹனவதி இப்போது சொல்கிறார்.

1993 முதல் 2009 வரை ஒதுக்கீடு செய்யப்பட்ட 195 நிலக்கரி வயல்கள் தொடர்பாக மத்திய புலனாய்வு துறை விசாரணை செய்கிறது. இவற்றில், மன்மோகன் நிலக்கரி அமைச்சகத்துக்கு பொறுப்பேற்றிருந்த காலத்தில் மட்டும் 160 சுரங்கங்கள் ஒதுக்கப்பட்டுள்ளன. மத்திய புலனாய்வு துறையும் 1993 - 2005 காலகட்டத்தில் ஒதுக்கப்பட்ட நிலக்கரி வயல்கள் மற்றும் 2006 - 2009 கால கட்டத்தில் ஒதுக்கப்பட்ட நிலக்கரி வயல்கள் ஆகியவை மீதான தனித்தனி முதற்கட்ட  விசாரணை குழு அமைத்து விசாரணை செய்கிறது. சுரங்க ஒதுக்கீடு தொடர்பான காணாமல்போன கோப்புகள் பற்றியும் மத்திய புலனாய்வு துறை விசாரணை செய்கிறது.

காங்கிரஸ் நாடாளுமன்ற உறுப்பினர்கள் விஜய் தார்தா, நவீன் ஜின்டால், முன்னாள் நிலக்கரி அமைச்சர் தாசரி நாராயண ராவ், ஆதித்யா பிர்லா குழும தலைவர் குமார்மங்கலம் பிர்லா ஆகியோர் முக்கிய குற்றவாளிகள்.
இத்தனை நாட்களும் நிலக்கரிச் சுரங்க ஒதுக்கீட்டில் முறைகேடே நடக்கவில்லை, ரூ.1.86 லட்சம் கோடி ஊழல் என தலைமை தணிக்கை அதிகாரி விநோத்ராய் சொன்னதெல்லாம் பொய், என்று திரும்பத்திரும்பச் சொல்லிக் கொண்டிருந்தனர் அய்முகூ அரசின் அமைச்சர்களும் அதிகாரிகளும் அட்வகேட் ஜெனரல்களும். 

இப்போது, அட்டர்னி ஜெனரல் வாஹனவதி மத்திய அரசு நிலக்கரிச் சுரங்க ஒதுக்கீட்டு விசயத்தில் இன்னும் சிறப்பான முறையைக் கடைப்பிடித்திருக்கலாம் என்று சொல்லி மொத்த ஊழல் நடவடிக்கையையும் திசைதிருப்பப் பார்க்கிறார்.  எல்லாவற்றையும் சிறந்த முறையில் செய்திருக்க முடியும், ஆனால், 1991-92 கால கட்டத்தில் மின் உற்பத்தியின் தேவை அதிகமாக இருந்தது, நாட்டின் நலன் கருதியே நாங்கள் அதைச் செய்தோம்.

இது தொடர்பாக ஒரு தேசியக் கொள்கையை வகுத்திருக்க வேண்டும், பின்னர் பார்க்கும்போதுதான் தெரிகிறது, தவறு நடந்துள்ளது என்று, அந்தத் தவறுகள் சரி செய்யப்பட வேண்டியுள்ளது. நீதிபதிகள் கருத்தை நான் ஒப்புக் கொள்கிறேன் என்று சொல்லி அடுத்த கட்ட சரிக்கட்டல் நடவடிக்கை எடுக்க அச்சாரம் போட்டுள்ளார் அட்டர்னி ஜெனரல்.

முதல் நாள், முறையான அனுமதி பெறாமல் வெறும் ஒதுக்கீடுக் கடிதத்தை மட்டும் வைத்துக் கொண்டு இருக்கும் நிறுவனங்களின் உரிமம் ரத்து செய்யப்பட வேண்டும் என்று மிகக் கடுமையாகக் கூறிய உச்ச நீதிமன்ற நீதிபதிகள் மறுநாள், நாங்கள் நல்ல முடிவுதான் எடுத்தோம் ஆனால், ஏதோ கொஞ்சம் தவறுகள் நடந்துள்ளது என்று சொல்லும் அட்டர்னி ஜெனரலைப் பார்த்து அதாவது மத்திய அரசைப் பார்த்து, “உங்களுடைய நோக்கம் சரியானதுதான். ஆனால், நீங்கள் செய்ததிலும் செயல்பட்டவிதத்திலும் ஏதோ தவறு ஏற்பட்டுள்ளது. நீங்கள் அதை இன்னும் கொஞ்சம் சிறப்பாகச் செய்திருக்க முடியும். ஆனால், அது மேலதிகாரிகள் செய்ய வேண்டியது” என்று கூறுகிறார்கள். அப்படி யென்றால், முதல் நாள் அவர்கள் காட்டிய கடுமை அரசாங்கத்தைக் கொஞ்சம் இறங்கி வர வைத்து அனுசரித்துப்போகச் செய்வதற்குதானோ என்று கேள்வி எழுகிறது.

அது மட்டுமல்லாமல் பிரச்சனையின் பிரதான விசயம் ஊழல், கொள்ளை, அரசு கஜானாவிற்கு பல லட்சம் கோடி இழப்பு என்பதில் இருந்து, முறைப்படி அனுமதி, உரிமம் பெறு, பிறகு அடி கொள்ளை என்று திசை மாற்றப்படுகிறது.

 நாட்டில் உள்ள கார்ப்பரேட் நிறுவனங்களான டாடா, பிர்லா, ஜின்டால், வேதாந்தா குழுமங்களுக்குத்தான் கடந்த பல ஆண்டுகளாக நிலக்கரிச் சுரங்கங்கள் ஒதுக்கீடு செய்யப்பட்டுள்ளன. மக்கள் வரிப்பணத்தையே வங்கிகள் மூலம் தங்கள் பணமாக்கிக் கோடி கோடியாய் கொள்ளையடிக்கும் டாடா, வேதாந்தா வகையறாக்கள் சுரங்கத்தில் முதலீடு செய்துவிட்டு சும்மா இருப்பார்களா?

நாங்கள் ரூபாய் இரண்டு லட்சம் கோடிக்கு மேல் முதலீடு செய்துள்ளோம். உரிமம் ரத்து செய்யப்பட்டால் எங்களுக்கு பெரிய இழப்பு,  நாட்டிற்கும் இழப்பு என்று கூவ ஆரம்பித்துவிட்டார்கள். இந்திய தொழில் கூட்டமைப்பு, முறையான அனுமதி, தடையில்லாச் சான்றிதழ் தரப்படாததற்கு நிறுவனங்கள் என்ன செய்யும், அரசாங்கம்தான் உரிய அனுமதியை கொடுத்திருக்க வேண்டும், அது அரசாங்கத்தின் வேலை என்கிறது. இந்தியத் தொழில் கூட்டமைப்பின் தலைமை இயக்குநர்  சந்திரஜித் பானர்ஜி, நாங்கள், நிறுவனங்கள், சுரங்கத்திற்கு ஒதுக்கீடு பெற்று தடையில்லா சான்றிதழ் மற்றும் உரிமத்திற்கு மனு செய்துவிட்டோம், வேலையையும் ஆரம்பித்துவிட் டோம், அந்த மனுவை அனுமதிக்க வேண்டியது மத்திய மாநில அரசுகளின் பொறுப்பு, அரசாங்கங்கள் அனுமதி தராமல் இருந்ததற்கு நாங்கள் எப்படிப் பொறுப்பாக முடியும் என்று கேட்கிறார்.

சாதாரண உண்ணாவிரதப் போராட்டத்திற்கு போலீஸ் கடைசி நேரம் வரை பதில் கொடுக்காமல் வைத்துக் கொண்டு, பின்னர் பந்தலுக்கு வந்து உங்களுக்கு அனுமதி இல்லை என்று அப்புறப்படுத்திவிடுவார்கள். அனுமதியோ மறுப்போ முதலிலேயே ஏன் தரவில்லை என்று சாமானியன் கேட்க முடியாது. ஆனால், அம்பானி, பானர்ஜி கும்பல்கள் அனுமதியே இல்லாவிட்டாலும் நாங்கள் சுரங்கம் தோண்டுவோம், நீ மறுக்காமல் அனுமதி தரவேண்டியது உன் வேலை என்கிறது அரசிடம்.

சுரங்க ஒதுக்கீட்டு உரிமங்களை ரத்து செய்தால், பல மில்லியன் டாலர் நஷ்டமாகும். அப்புறம் எந்தவொரு நிறுவனமும் இந்தியாவில் தொழில் தொடங்க வராது, பார்த்துக் கொள்ளுங்கள் என்று வேறு மிரட்டுகிறார்கள் கார்ப்பரேட் முதலாளிகள். சுரங்க உரிமங்கள் ரத்து செய்யப்பட்டால் உண்மையில் பாதிக்கப்படப்போவது வங்கிகள்தான். கார்ப்பரேட் கொள்ளையர்கள் தங்கள் சொந்த பணத்தையா சுரங்கத்தில் போட்டிருக்கிறார்கள்? வங்கியில் இருந்து வட்டியில்லாமல் வாங்கிய பணத்தையல்லவா? ஆனாலும், புதிய நிறுவனங்களுக்கு முறைப்படி நியாயமான வகையில் ஓதுக்கீடு செய்தால், ஏற்கனவே நிறுவனங்கள் சுரங்கத் தொழிலுக்கு வாங்கிய வங்கிக் கடன்களை புதிய நிறுவனங்களிடம் மாற்றி விடலாம். அதன் மூலம் வங்கிகள் தப்பிக்கலாம் என்று கார்ப்பரேட் நிர்வாக ஆலோசனை அமைப்பான இன்கவர்ன் ரிசர்ச் சர்வீஸ்ஸின் நிறுவனர் ஸ்ரீராம் சுப்பிரமணியன் சொல்கிறார். நடக்குமா அது? டாடாவும், பிர்லாவும் ஜின்டாலும் தம் கைக்கு வந்ததைத் திருப்பித்தர தயாராக இருப்பார்களா?

அய்முகூ அரசும் அடுத்து வரவிருக்கிற நாடாளுமன்றத் தேர்தலில்  மரணஅடி வாங்காமல் இருக்க, காங்கிரஸ் தன் கையில் உள்ள ஊழல் கறையை மறைக்க, ஏதேதோ செய்து பார்க்கிறது. ஊழல்களை ஒப்புக்கொள்வது இப்போது காங்கிரஸ் ஸ்டைல். ஆனால், ஊழலுக்கு நாங்கள் காரணமல்ல, நாங்கள் செய்யவும் இல்லை, எந்தவொரு ஊழல்களிலும் எங்கள் கட்சிக்கோ, கட்சித் தலைமைக்கோ, எங்கள் அமைச்சர்களுக்கோ எவ்வித தொடர்பும் கிடையாது, நாங்கள் எல்லாரும் பரிசுத்தவான்கள் என்று  சொல்லி அதிகாரிகளை பலிகடா ஆக்குகிறது. ஆதர்ஷ் அடுக்குமாடிக் குடியிருப்பு விசயத்தில், நீதிபதியின் விசாரணை அறிக்கையை  நிராகரித்த மஹாராஷ்டிரா காங்கிரஸ் அரசு, பின்னர் இளவரசர் ராகுல் காந்தி சொல்லிவிட்டார் என்று அறிக்கையை பகுதி அளவில் ஏற்றுக் கொண்டது.

ஆனால், அந்த அறிக்கையில் முன்னாள் முதல்வர்கள் மீது சுமத்தப்பட்டுள்ள குற்றங்களை நிராகரித்துவிட்டு அதிகாரிகள் மீது நடவடிக்கை எடுக்கப்போகிறது. நிலக்கரிச் சுரங்க ஒதுக்கீட்டிலும் நடந்துள்ள ‘சின்ன’ தவறுகளுக்கு அதிகாரிகள் மீது பழிசுமத்த ஆயத்தம் ஆகிவிட்டது அய்முகூ அரசு. அடுத்து அலைக்கற்றை விற்பனையில் செய்ததுபோல் மறு ஏலம் மாய்மாலங்கள் செய்து நிலக்கரி சுரங்கங்களைத் திரும்பவும் டாடா, பிர்லா, வேதாந்தாக்களிடம் தாரைவார்த்து விடும்.

அதற்கேற்பவே அடுத்தடுத்து காய்கள் நகர்த்தப்படுகின்றன. ஜனவரி 12 அன்று நிலவரப்படி கிட்டத்தட்ட 60 நிலக்கரி சுரங்கங்களை ஒதுக்கீடு பெற்றுள்ள நிறுவனங்கள் மீது எந்தவொரு குற்றமும் இல்லை என்று மத்திய குற்றப் புலனாய்வுத் துறை கண்டுபிடித்துள்ளதாம். 195 சுரங்க ஒதுக்கீடுகளில்  16 வழக்குகளில் மட்டுமே குற்றம் புரிந்துள்ளதற்கான முகாந்திரம் உள்ளதாம்.

தொலைந்து போன கோப்புகள் தொடர்பாக தொடக்கநிலை விசாரணை நடக்கிறதாம். அதேநேரம், நிலக்கரிக் சுரங்க ஊழல்கள் சம்பந்தமான தேவையான எல்லா கோப்புகளும் மத்தியக் குற்றப் புலனாய்வுத் துறை வசம் வந்து விட்டது அதனால், விசாரணையை முடித்துக் கொள்ளலாம் என்று உச்சநீதிமன்றத்தில் மத்திய புலனாய்வுத் துறை சொல்லும் என்று கூறப்படுகிறது.

1993 - 2005 காலகட்டத்தில் தரப்பட்ட 41 ஒதுக்கீடுகளை ரத்து செய்யப்போவ தாகவும் இன்னும் 61 ஒதுக்கீடுகள் இன்னும் 6 வாரங்களுக்குள் குறைபாடுகளை சரிசெய்து கொள்ள வேண்டும் என்று சொல்லப்
போவதாகவும் மத்திய அரசு கூறுகிறது. அலைக்கற்றை ஒதுக்கீட்டில் உச்சநீதி மன்றம் ஒதுக்கீடுகளை ரத்து செய்ததுபோல், சுரங்க வயல் ஒதுக்கீடு பிரச்சனையும் நடப்பதற்கு முன் மத்திய அரசு முந்திக் கொண்டு தானே சில ஒதுக்கீடுகளை ரத்து செய்துவிட்டது. அத்துடன் மற்றவற்றை விட்டுவிடுங்கள் என்றும் உச்ச நீதிமன்றத்துக்கு மத்திய அரசு செய்தி சொல்கிறது.

தொடர் விபத்துக்கள் ரயில் பயணிகளை அச்சுறுத்தும்போது, ரயில்வேயில் புறநகர் பாதை, அதிவேக ரயில் திட்டங்கள், சரக்கு வழித் திட்டங்கள் ஆகியவற்றில் 100 சதம் அந்நிய நேரடி முதலீடு அனுமதிக்கப்படும் என்று அறிவிப்பு வெளியாகிறது. அடுத்த 5 ஆண்டுகளில் 1000 கோடி டாலர் முதலீடு வரும் என்று சொல்லப்படுகிறது.

 இந்த முதலீட்டு வருகைக்காக பயணிகள் பாதுகாப்பை தனியார் கருணைக்கு விட்டுவிடுவதுடன் நாட்டின் செல்வத்தையும் கார்ப்பரேட் நிறுவனங்கள் கொள்ளையடிக்க அய்முகூ ஆட்சியாளர்கள் வழிவகுக்கிறார்கள்.

அப்பழுக்கில்லாத துரோகம். அனைத்தும்தழுவிய வஞ்சகம்.காங்கிரசும் பாஜகவும் மாற்றி மாற்றி ஊழல் பற்றி பேசுகின்றன. ஆனால் கார்ப்பரேட் கொள்ளையர்களைக் காப்பாற்றுவதில் இரண்டு பேருக்குமே போட்டி. சுரங்க ஊழலுக்கு பிரதமரை பதவி விலகச் சொல்லும் பாஜக, மற்றொரு சுரங்க ஊழலால் வெளியேற்றப்பட்ட எடியூரப்பாவுக்கு மீண்டும் சிவப்பு கம்பளம் விரிக்கிறது. திமுக, அஇஅ திமுக, ஆர்ஜேடி, சமாஜ்வாடி என எல்லா மாநிலக் கட்சிகளும் ஊழலிலும் கார்ப்பரேட்டுகளுக்கு சேவை செய்வதிலும் தேசியக் கட்சிகளுக்கு தாங்கள்   சளைத்தவர்கள் இல்லை என்று ஜல்லிக்கட்டு நடத்திக் கொண்டிருக்கிறார்கள்.

மாணவர்கள், இளைஞர்கள், வழக்கறிஞர்கள் தொழிலாளர் போராட்டத்திற்கு ஒருமைப்பாடு

டிசம்பர் 21 அன்று, 2 ஆண்டுகளாக சம்பள உயர்வு கிடைக்காமல் போராடும் ஜிம்கானா தொழிலாளர்கள், சட்ட விரோத சம்பளப் பிடித்தம், தொழிலாளர் மீதான பழி வாங்கும் நடவடிக்கைகளுக்கு எதிராக போராடும் ஏசியன் பெயிண்ட்ஸ் தொழிலாளர்களை அகில இந்திய மாணவர் கழகம், புரட்சிகர இளைஞர் கழகம் மற்றும் ஜனநாயக வழக்கறிஞர் சங்க முன்னோடிகள் சந்தித்து ஆதரவு தெரிவித்தனர். தொழிலாளர் போராட்டம் வெல்ல மாணவர்கள், இளைஞர்கள், வழக்கறிஞர்கள் ஒத்துழைப்பு அளிக்க இருப்பதாகக் கூறினர்.

21.12.2013 அன்று அகில இந்திய மாணவர் கழக மாநிலச் செயலாளர் சீதா, புரட்சிகர இளைஞர் கழக முன்னணித் தோழர்கள் அன்பு, ராஜகுரு, தனவேல், ராஜசங்கர், கார்த்தி, வினோத், ஏசியன் பெயிண்ட்ஸ் குணா, மதியழகன், திலீப்குமார், நரேஷ், மதுரை பல்கலைக்கழக அய்சா தலைவர்கள் அருண், பாண்டியராஜன், ஜனநாயக வழக்கறிஞர் சங்கத் தோழர்கள் அதியமான், சுரேஷ், ரகுநாதன், விஜய், சுரேந்திரன், நாகராஜன், கௌரி, புரட்சிகர இளைஞர் கழக தேசிய செயலாளர் பாரதி ஆகியோர் தொழிலாளர்களைச் சந்தித்து ஆதரவு தெரிவித்தனர். இககமாலெ மாநில செயலாளர் பாலசுந்தரம் ஜிம்கானா தொழிலாளர் மத்தியில் உரையாற்றினார்.

ஜிம்கானா தொழிலாளர் போராட்டத்திற்கு ஜனநாயக வழக்கறிஞர் சங்க தோழர்கள்  ரூ.5,000மும், புரட்சிகர இளைஞர் கழக தோழர்கள் ரூ.8,000மும் நிதியளித்தனர். உக்ரைனில் மருத்துவ மேற்படிப்பு பயிலும் மருத்துவர் அஞ்சனா துர்கா தேவியும் புரட்சிகர இளைஞர் கழக தோழர்களுடன் தொழிலாளர்களைச் சந்தித்தார். புரட்சிகர இளைஞர் கழகம் ஏசியன் பெயின்ட்ஸ் தொழிலாளர்கள், போராட்டத்திற்கு ஆதரவாக சுவரொட்டி பிரச்சாரம் நடத்தியது.          

23 நாட்களாக தொடர் உள்ளிருப்புப் போராட்டத்தில் ஜம்போ பேக் தொழிலாளர்கள்

திருவள்ளூர் மாவட்டத்தில் இயங்கி வரும் ஜம்போ பேக் என்ற பேக்கேஜிங் பொருட்கள் தயாரிக்கும் தொழிற்சாலைக்கு மொத்தம் 3 யூனிட்டுகள் உள்ளன. தச்சூர் கூட்டு ரோடிலுள்ள யூனிட்டில் ஏஅய்சிசிடியு சங்கம் உள்ளது. இங்கு 160 நிரந்தரத் தொழிலாளர்களும் 600 ஒப்பந்தத் தொழிலாளர்களும் வேலை செய்கின்றனர்.

18 ஆண்டுகளுக்கு மேல் பணிபுரிந்தும் நிரந்தரத் தொழிலாளர் ஊதியம் ரூ.6000 தாண்டவில்லை. அரசு இந்தத் தொழிலுக்கு அறிவித்துள்ள குறைந்தபட்ச கூலி சட்டத்தின்படி அடிப்படை சம்பளமும், பஞ்சப்படியும் இணைத்து ரூ.6000 வழங்க வேண்டும். ஆனால் நிர்வாகம் இந்த ரூ.6000க்குள் மற்ற படிகளையும் இணைக்கிறது. இதனால் தொழிலாளர்களுக்கு வருங்கால வைப்பு நிதி, போனஸ், ஓவர் டைம், பணிக்கொடை, ஓய்வூதியம் என 5 வகைகளில் இழப்பு ஏற்படுகிறது. குறைந்தபட்ச ஊதியம் கூட கொடுக்காமல் நடைபெறும் சுரண்டலோடு, ஒவ்வொரு முறையும் ஒப்பந்த காலத்தையும் நீடித்து வருகிறது.

3 ஆண்டுகால ஒப்பந்தத்தை இழுத்தடித்து 4 ஆண்டுகளாக ஆக்கி விடுகிறது. ஏற்கனவே இரு முறை ஒப்பந்தத்தைத் தள்ளிப் போட்டு தொழிலாளர் ஊதியத்தை கொள்ளையடித்த நிர்வாகம் ருசி கண்ட பூனை உறியில் தாவிக் குதிப்பது போல் இம்முறையும் ஒப்பந்த காலத்தை நீட்டிக்க முயற்சிக்கிறது.

நிர்வாகத்தின் இந்தப் போக்கு விஷம் தரும் போக்கு. தொழிலாளர்கள் ஒரு நாளும் விஷத்தை சாப்பிட முடியாது. இதற்கு எதிராகவும், குறைந்தபட்ச ஊதியத்திற்குள் மற்ற படிகளை சேர்த்து அடிப்படை சம்பளம் மற்றும் பஞ்சப்படி குறைப்பதை எதிர்த்தும், நீண்ட போராட்டத்தில் தொழிலாளர்கள் ஈடுபட்டிருக்கிறார்கள். போராட்டத்திலுள்ள தொழிலாளர்கள் ஆலைக்கு அருகிலேயே உணவு சமைத்து சாப்பிட்டு வருகிறார்கள். அருகிலுள்ள ஊர் மக்கள் அரிசியும் நிதியும் கொடுத்து உதவி வருகிறார்கள். மிகப் பெரிய உழைப்பு சுரண்டல் மற்றும் கொள்ளை லாபத்திற்கு எதிராக வலுவான போராட்டம் தொடர்கிறது.

நெல்லை மாணவி பாலியல் வன்முறை வழக்கை விரைந்து நடத்து: மாலெ கட்சி ஆர்ப்பாட்டம்

நெல்லை பேட்டையில் உள்ள கத்தோலிக்க தேவாலயத்தின் பொறுப்பாளர் பாதிரியார் செல்வம். அந்த தேவாலய நிர்வாகத்தின் கீழ் உள்ள பள்ளிக்கூடத்திற்கு தாளாளரும் அவர்தான். அவர் அப்பள்ளியில் படிக்கும் 15 வயது பத்தாம் வகுப்பு மாணவியை தன் வீட்டிற்கு வந்து வேலைகள் செய்ய வைத்துள்ளார். அந்த மாணவியும் அவர் வீட்டு வேலைகளைச் செய்து வந்துள்ளார். பாதிரியார் தன் வீட்டிற்கு வந்த பள்ளி மாணவியை பாலியல் வல்லுறவு செய்ததால், கருத்தரித்த பெண்ணை அதை கலைக்கச் சொல்லி பணம் கொடுத்துள்ளார். ஒரு தனியார் மருத்துவமனையில் கரு கலைக்கப்பட்டது. பணம் கொடுத்து  எல்லாவற்றையும் மறைக்கப் பார்த்தனர்.

 பிரச்சனை வெளியே தெரிய வந்த பின்னரும் காவல்துறை, பாதிரியார் மீது புகார் வரவில்லை என்று சொல்லி முதலில் நடவடிக்கை எடுக்கவில்லை. இந்நிலையில், இகக(மாலெ)  மற்றும் இதர அமைப்பினர் எடுத்த முயற்சியின் காரணமாக வழக்கு பதிவு செய்யப்ட்டது. பாதிரியார் வேறு வழியின்றி நீதிமன்றத்தில் சரணடைந்தார். பாதிரியார் இதற்கு முன்பு பணியாற்றிய இடங்களிலும் வேறு சில பெண்களிடமும் பாலியல் துன்புறுத்தல்களில் ஈடுபட்டுள்ளார் என இப்போது தெரியவருகிறது. பாதிரியார் செல்வத்திற்கு, பாலியல் வன்முறைக்கு எதிராக தமிழக அரசு அறிவித்துள்ள 13 அம்சத் திட்டத்தில் கூறியுள்ளதுபோல் உரிய தண்டனை விரைந்து வழங்க நடவடிக்கை எடுக்க வேண்டும்,  பாதிக்கப்பட்ட மாணவிக்கு அரசு, அவரின் படிப்பு மற்றும் வாழ்க்கைக்கான முழு நிவாரணம் வழங்க வேண்டும், அந்த மாணவியின் கவுரவத்திற்கு இழுக்கு ஏற்படாத வகையில் தமிழக அரசு உரிய பாதுகாப்பு வழங்க வேண்டும் என்பதை வலியுறுத்தி 27.12.2013 அன்று மார்க்சிஸ்ட் லெனினிஸ்ட் கட்சி மற்றும் அகில இந்திய முற்போக்குப் பெண்கள் கழகம் ஆர்ப்பாட்டம் நடத்தின.

ஆர்ப்பாட்டத்திற்கு அகில இந்திய முற்போக்குப் பெண்கள் கழக மாவட்ட அமைப்பாளர் தோழர் அன்புச்செல்வி தலைமை தாங்கினார். மார்க்சிஸ்ட் - லெனினிஸ்ட் கட்சியின் நெல்லை மாவட்டச் செயலாளர் தோழர் டி.சங்கரபாண்டியன், மாநிலக்குழு உறுப்பினர் தோழர் ஜி.ரமேஷ், மாவட்டக்குழு உறுப்பினர்கள் தோழர்கள் கே.கணேசன், கருப்பசாமி, எஸ்.டி.பி.அய் கட்சியின் நசீர்கான், இனப்படுகொலைக்கு எதிரான தமிழர் கூட்டமைப்பைச் சேர்ந்த பீட்டர், விஜயகுமார் பாக்கியம், தமிழர் களம் அமைப்பைச் சேர்ந்த அல்போன்ஸ், பரதர் நல பேரவை எட்வர்ட் மற்றும் வழக்கறிஞர் அப்துல் ஜப்பார், தமிழீழன், அருள்வின் ஆகியோர் உரையாற்றினர்.

21 டிசம்பர், அணுத் தீமையற்ற தமிழக தினம் நெல்லையில் மாலெ கட்சி பிரச்சாரம்

கூடங்குளம் அணுஉலையை மூடக் கோரி போராட்டங்கள் நடத்தி வரும் மார்க்சிஸ்ட் லெனினிஸ்ட் கட்சி உட்பட பல்வேறு அமைப்புகளும் அணுசக்திக்கு எதிரான மக்கள் இயக்கமும்  21.12.2013 அன்று அணுத் தீமையற்ற தமிழக தினம் அனுசரிக்க முடிவு செய்தது.

மாலெ கட்சியின் சார்பாக 21.12.2013 அன்று நெல்லை சந்திப்பு ரயில் நிலையத்தில் பொதுமக்கள் மத்தியில் அணுத் தீமை பற்றி பிரச்சாரம் செய்து துண்டுப் பிரசுரங்கள் விநியோகிக்கப்பட்டன. நெல்லை சந்திப்பு ரயில் நிலையத்தில் தொடங்கி பேருந்துநிலையம் மற்றும் நகரப் பகுதிகளிலும் இந்தப் பிரச்சாரம் நடந்தது.  பிரச்சாரத்திற்கு மார்க்சிஸ்ட் லெனினிஸ்ட் கட்சியின் மாநிலக்குழு உறுப்பினர் தோழர் ஜி.ரமேஷ் தலைமை தாங்கினார்.

கட்சி மாவட்டக் கமிட்டி உறுப்பினர்கள் தோழர்கள் கணேசன், ரவி டேனியல், சுந்தர்ராஜன் மற்றும் ஆவுடையப்பன், ஜானகிராமன், சுடலைமணி, சங்கரநாராயணன் உட்பட பலர் கலந்து கொண்டனர்.

ஜனவரி 4, 5 தேதிகளில் இடிந்தகரையில் அணுசக்திக்கெதிரான மக்கள் இயக்கம் நடத்திய இரண்டு நாட்கள் கருத்தரங்குகளில் மாலெ கட்சி சார்பாக மாநிலக் கமிட்டி உறுப்பினர் தோழர் ஜி.ரமேஷ் கலந்துகொண்டார்.


Wednesday, January 1, 2014

மாலெ கட்சியின் சென்னை மாநகர மாநாடு

கட்சியின் சென்னை மாநகர மாநாடு டிசம்பர் 22 அன்று தோழர் சீனிவாசன் அரங்கத்தில் நடைபெற்றது. தோழர் குப்பாபாய் மாநாட்டு கொடியினை ஏற்றினார். தோழர் குமரேஷ்  அஞ்சலி தீர்மானம் முன்வைத்தார். தோழர் சீனிவாசன், மற்றும், தோழர்கள் அய்யனார், முத்துக்குமார், திரிபுரசுந்தரி, சொர்ணவல்லி ஆகிய சென்னை தோழர்களின் மறைவிற்கும், நெல்சன் மன்டேலா, மற்றும் தோழர்கள் சாருமஜூம்தார், வினோத்மிஸ்ரா, நாகபூஷன், ராம் நரேஷ் ராம், மகேந்திர சிங், கங்காராம் கோல், உள்ளிட்ட அனைத்து தியாகிகளுக்கும் அவை அஞ்சலி செலுத்தியது. தோழர்கள் ஜவகர், இரணியப்பன், குமரேஷ், தேவகி, கணேசன், ஜீவானந்தம், லில்லி ஆகியோர் கொண்ட தலைமை குழு மாநாட்டை நடத்தியது.

அழைக்கப்பட்ட 125 பிரதிநிதிகளில் 111 பேர் கலந்து கொண்டனர். புதிய தோழர்கள், இளம்தொழிலாளர்கள் 32 பேர் பார்வையாளர்களாக கலந்துகொண்டனர். பிரதிநிதிகள் பார்வையாளர்கள் என பெண் தோழர்கள் 32 பேர் கலந்துகொண்டனர். 1100 தீப்பொறி சந்தாக்கள் விவரம் மற்றும் ரூ.1,10,000 அவையில் தீப்பொறி ஆசிரியரும் மத்தியகமிட்டி உறுப்பினருமான தோழர் மஞ்சுளாவிடம் ஒப்படைக்கப்பட்டது. மாநில கமிட்டி உறுப்பினர் தோழர் ஜானகிராமன் மாநில பார்வையாளராக கலந்து கொண்டார். மாநாட்டில் மாநில கமிட்டி உறுப்பினர்கள், தோழர்கள் பாரதி, தேன்மொழி, மலர்விழி ஆகியோரும் பங்கேற்றனர்.

மாநாட்டு விவாதக் குறிப்புக்களை மாநகரச் செயலாளர் தோழர் சேகர் முன்வைத்தார். சர்வதேச, தேசிய மற்றும் தமிழக அரசியல் சூழல் பற்றிய குறிப்புக்கள் மீது விவாதங்கள் நடத்திய மாநாடு, மூலதனம் செயல்படும், கருத்து உருவாகும், ஒப்புதல் உற்பத்தி செய்யப்படும், உபரி மக்கள் தொகை, தொழில்துறை சேமப்பட்டாளம் கொட்டப்படும் குப்பைக்கூடமாக மாறியுள்ள மாநகரத்தில் எப்படி தலையிடுவது என சென்னை மாநகர வேலைகள் பற்றி கவனம் குவித்தது. விவாதத்தில் 23 பிரதிநிதிகள், 3 பார்வையாளர்கள் பங்கேற்றனர். அரசியல் தலைமைக்குழு உறுப்பினர் தோழர் குமாரசாமி விவாதங்களை தொகுத்தும், அடுத்த கட்ட கடமைகள் குறித்தும் நிறைவுரையாற்றினார்.

மாநாட்டில் 35 பேர் கொண்ட கமிட்டி தேர்ந்தெடுக்கப்பட்டது. தோழர் எஸ்.சேகர் மீண்டும் மாநகரச் செயலாளராக தேர்ந்தெடுக்கப்பட்டார்

விழுப்புரம்: ஊராட்சி மட்ட முன்முயற்சி

விழுப்புரம் மாவட்டம் அத்தண்டமருதூர் ஊராட்சியில் நடைபெறும் ஊழல் முறைகேடுகள் மீது தமிழக அரசு, உள்ளாட்சித்துறை ஆணையர் விசாரணை செய்து ஊழல் முறைகேடுகளுக்குக் காரணமான துறை அதிகாரிகள் உள்ளிட்டோர் மீது உரிய நடவடிக்கை எடுத்திடக் கோரி 11.12.2013 அன்று மாலெ கட்சியும் அவிதொசவும் ஆர்ப்பாட்டம் நடத்தின. 150 பேர் கலந்து கொண்டனர். ஆர்ப்பாட்டம் முடிந்து, பிடிஓ ஆபீஸ் சென்று மனு கொடுத்ததில் ஒரு வார காலத்தில் நடவடிக்கை எடுக்கப்படும் என எழுத்துபூர்வமாக உறுதியளிக்கப்பட்டது.

16.12.2013 அன்று பிடிஓ பத்து வருடங்களாகத் திறக்காமல் இருந்த பொதுக் கழிப்பிடத்தைத் திறந்து வைத்தார். தாய்த் திட்டத்தில் போடப்பட்டுள்ள 6 கைப்பம்ப்புகளை உடனடியாகச் செயல்படுத்த உரிய நடவடிக்கை எடுத்தார். குடிநீர் வழங்காமல் இருந்ததை உடனடியாக வழங்கிட நடவடிக்கை எடுத்தார்.

ஊராட்சி அலுவலகம் உள்ள கட்டிடத்தில் இயங்க வேண்டும் என வலியுறுத்தினார். ஊராட்சி (கணக்கு) மினிட் போட்டு பார்வையிட்டு முற்றிலும் தவறாகவும், எழுதாமலும் உள்ளதைக் கண்டித்தார். ஊராட்சி கணக்கு முடக்கம் செய்யப்பட்டுவிட்டது என அவிதொச தோழர்கள், ஊர் பொதுமக்கள் முன்னால் கூறிவிட்டு சென்று விட்டார்.

 பி.சின்னதுரை, அவிதொச கிளைத்தலைவர், தலைமையில் ஆர்ப்பாட்டம் நடைபெற்றது. எம். வெங்கடேசன், சிபிஅய்எம்எல் மாவட்ட செயலாளர், எ.செண்பகவள்ளி அகில இந்திய முற்போக்கு பெண்கள் கழக மாவட்ட செயலாளர், சிபிஅய்எம்எல் நகர அமைப்பாளர் ஜி.லோகநாதன், ஏஅய்சிசிடியு மாவட்ட அமைப்பாளர் என்.கணேசன், ஒன்றிய அமைப்பாளர் ஆர்.தணிகாசலம் ஆகியோர் கண்டன உரையாற்றினார்கள்.     

டெல்லிக்குச் செல்லும் செங்கோட்டை எக்ஸ்பிரஸ் தயார் !

அனைத்திந்திய அண்ணா திராவிட முன்னேற்றக் கழகத்தின் செயற்குழு மற்றும் பொதுக்குழு கூட்டம் டிசம்பர் 19 அன்று சென்னையில் நடைபெற்றது. மண்டப வாயிலில், டெல்லி செங்கோட்டை மற்றும் இந்திய நாடாளுமன்ற கட்டிடங்களின் முகப்புக்கள், கண்கவர் அலங்கார வளைவுகளாக வைக்கப்பட்டன. அஇஅதிமுகவினர், உபி, பஞ்சாப், குஜராத், கர்நாடகா, ஆந்திராவைச் சேர்ந்தவர்களுக்கெல்லாம், இதுவரை பிரதமராகும் வாய்ப்பு கிடைத்திருந்தது; தமிழ்நாட்டிலிருந்து ஜெயலலிதா பிரதமராகும் நேரம் இப்போது வந்துவிட்டது என்றார்கள்.

தமிழகத்திற்கு எதிரான பலவீனமான, திறமையற்ற, மத்திய அரசு எனச் சாடிய அஇஅதிமுக, மத்திய அரசுக்கு தானே தமிழகத்தில் முதன்மையான எதிர்க்கட்சி என மீண்டும் ஒரு முறை காட்டிக் கொண்டது. புதிய அவதாரத்திற்கு அஇஅதிமுகவும் ஜெயலலிதாவும் தயார் என டிசம்பர் 19 பொதுக்குழு பறைசாற்றியது.

எம்ஜிஆரும் ஜெயலலிதாவும் தலா மூன்று முறை ஜெயின்ட் ஜார்ஜ் கோட்டை எக்ஸ்பிரஸ் ஏறி தமிழகத்தில் ஆட்சியைப் பிடித்து விட்டார்கள் என்றும், இப்போது, மத்திய அதிகாரத்தைப் பிடிக்க, மத்தியிலும் ஆளும் கட்சியாக, டெல்லி செங்கோட்டை எக்ஸ்பிரஸ் டிரெய்ன் தயார் என அறிவிக்கப்பட்டது.

நாட்டின் பாதுகாப்பையும் முன்னேற்றத்தையும், நாடாளுமன்றத் தேர்தல்களில் அஇஅதிமுக வெற்றியே உறுதி செய்யும் எனச் சொன்ன ஜெயலலிதா, இரட்டை இலை, அமைதி, வளமை, முன்னேற்றம் (PEACE, PROSPERITY, PROGRESS) என்ற மூன்று P-க்களை நாட்டிற்கும் நாட்டு மக்களுக்கும் வழங்கும் என்றார்.

ஜெயலலிதா அஇஅதிமுகதான் செங்கோட்டை எக்ஸ்பிரஸ் என்றும், அந்த வண்டியை தமிழ்நாட்டின் புதுச்சேரியின் மக்கள் பச்சைக்கொடி காட்டி அனுப்பி வைப்பார்கள் எனவும், தாமே வண்டியின் ஓட்டுநர் எனவும், கட்சித் தொண்டர்கள் அந்த எக்ஸ்பிரஸ் டிரெயின் வண்டியும், நாடாளுமன்ற உறுப்பினர்கள் என்ற பயணிகளும், பாதுகாப்பாகவும் வெற்றிகரமாகவும் டெல்லி செல்வதை உறுதி செய்வார்கள் என்றும் மகிழ்ச்சியோடும் பெருமிதத்தோடும் சொன்னார்.

ஜெயலலிதாவிற்கோ அஇஅதிமுகவிற்கோ பிரதமர் கனவு காணும் உரிமை உண்டு. ஆனால் ஜெயலலிதா ஓட்டுநராக இருக்கும் வண்டியில் அதிகபட்சம் 40 இடங்கள்தான் உண்டு. டெல்லி அதிகாரத்தை நோக்கி, தமது டிரெயின்தான் முதலில் போகும் எனவும், அதில்தான் கூடுதல் பயணிகள் இருப்பார்கள் எனவும் பாஜக சொல்கிறது. தம்முடைய ஓட்டுநர் நரேந்திர மோடிதான், இந்தியாவிலேயே வலுவான தலைவர் எனவும், அவரால்தான் தீர்மானகரமான அரசாளுகை வழங்க முடியும் எனவும் பாஜக அடித்துப் பேசுகிறது.

இகக, இககமா கட்சிகள் 40க்கு 40 என அம்மா சொல்லும்போது, அந்த 40ல் தமக்கு ஏதாவது ஒரு மூலையிலாவது இடம் கிடைக்காதா எனத் தவிக்கின்றனர். தங்களுக்கு அந்த வண்டியில் இடம் கிடைத்துவிட்டால், அந்த வண்டிக்கு தம் கைவசம் தயாராயுள்ள முற்போக்கு ஜனநாயக மதச்சார்பற்ற என்ற பட்டங்களைக் கட்டிவிடத் தயாராகின்றனர். (ஏற்காடு இடைத்தேர்தலில் ஏற்கனவே ஒத்திகை பார்த்துவிட்டனர்)

தமிழகத்தில் இருந்து தனியாக காங்கிரஸ் பாஜக டிரெயின்கள் புறப்படுவது மிகமிகக் கடினம். டிரெயின்கள் ஓட ஏதாவது ஒட்டு டிரெய்னை கோத்துக் கொள்ள முடியுமா எனப் பார்க்கின்றனர். ஒவ்வொரு நேரத்திலும் அரசியலில் வித்தியாசமான ஒரு கோமாளி வருவார். இம்முறை தமிழருவி மணியன், அந்த வேலையை எடுத்துக் கொண்டு பாஜக வண்டியில் , மதிமுக தேமுதிக பாமக ஒட்டு வண்டிகளைக் கோர்க்கப் பார்க்கிறார். தமிழகத்தின் முதுபெரும் அரசியல்வாதி நாளொரு தடுமாற்றமும் பொழுதொரு குழப்பமுமாய், எப்படியும் தம் வண்டியும் ஓடும் என்கிறார். எல்லா வண்டிகளும் நாடாளுமன்றத் தேர்தலில் டெல்லி செங்கோட்டை நோக்கியே ஓடுகின்றன.

இந்த வண்டிகளில் பயணம் போகக் கூடியவர்கள் அனைவருமே மக்கள் வாக்குகளில்தான் வெற்றி பெறுவார்கள். ஆனால், அவர்களின் ஆட்சிகள் மக்களுக்கானதாக அமையுமா?

தமிழ்நாட்டிற்கு தாம் தந்த, எத்தகைய அமைதியை வளமையை முன்னேற்றத்தை, இந்தியாவிற்கு ஜெயலலிதா தரப் போகிறார்?.  பழைய திரைப்படப் பாடல் ஒன்று சாந்தமுலேகா சௌக்கியமுலேது என்ற தெலுங்கு வரிகளை ஒலிக்கும். அமைதி இல்லை. சுகம் இல்லை.

பரமக்குடியில் சுட்டுக் கொல்லப்பட்ட தலித்துகள், தர்மபுரியில் தாக்குதலுக்குள்ளான தலித்துகள், மரக்காணத்தில் குறிவைக்கப்பட்ட தலித்துகள் நிம்மதியாக இல்லை. கவுரவத்துடன் சமத்துவத்துடன் வாழ நினைக்கும் தலித்துகளுக்கு அமைதியும் இல்லை. நிம்மதியும் இல்லை.

தமிழ்நாட்டின் இசுலாமிய சிறுபான்மையினர் ஒரு வழியாக தேசிய நீரோட்டத்தில் இணைக்கப்பட்டுவிட்டனர். மக்கள் தொகைக்குப் பொருந்தாத அளவுக்குச் சிறைகளில் உள்ளனர். பெங்களூருவில் குண்டு வெடித்தால், நெல்லை மேலப்பாளையத்தில், கோவையில் இசுலாமியர்கள் கைது செய்யப்படுவார்கள். பயங்கரவாதம் என்ற சொல்லுக்கு முன்பு இசுலாமிய என்ற அடைமொழியைச் சேர்த்து அய்க்கிய அமெரிக்கா உலகின் மீது திணித்ததை, இந்தியா ஆரத் தழுவிக் கொண்டது.

திண்பொருள் மென்பொருள் சேர்ந்து இருப்பதுபோல்,  வன்மையான  இந்துத்துவாவும் மென்மையான இந்துத்துவாவும் இணைந்தே செயல்படுகின்றன. இசுலாமியர்க்கெதிரான பழி சுமத்தும் வேட்டையில், தமிழகம், இந்திய ஒருமைப்பாட்டின் மீது சத்தியம் செய்து செயல்படுகிறது.

நல்ல வேலைகளும் வருமானமும் தராமல், நீதி நெறிகள் அறங்கள்படி நடக்காமல், தமிழ் சமூகம் ஏராளமான குற்றவாளிகளை உருவாக்குகிறது. 2011ல் தாம் ஆட்சிக்கு வந்தவுடன் குற்றவாளிகள் எல்லாம் வெளி மாநிலங்களுக்கு ஓடிவிட்டதாக ஜெயலலிதா பெருமை பேசினார்.

ஓராண்டு ஈராண்டு சாதனைப் பட்டியலில், ஜெயலலிதா, தேசிய குற்ற பீரோ பதிவுகளில் தமிழகம் முந்திக் கொண்டு முன்னேறுகிறது என்பதைச் சேர்க்காமல் விட்டுவிட்டார். முப்பொழுதும், தமிழகமெங்கும் கொலை கொள்ளை வழிப்பறி நடக்கின்றன. சாதனைக்குரியவை என்று சொல்லப்பட்ட இரண்டாண்டுகள் ஆட்சிக் காலத்தில் தமிழகத்தில் 3,231 கொலைகள் நடந்துள்ளன.

விரும்பியவரைக் காதலிக்க முடியாது, அச்சமற்ற சுதந்திரத்துடன் வாழ முடியாது என ஆதிக்க  சக்திகளால் 19ஆம் நூற்றாண்டுக்குத் தள்ளப்படும் பெண்களுக்கு நிம்மதி உண்டா? அமைதி உண்டா? நாசகரமான கூடங்குளம் அணுமின் நிலையம் வேண்டாம் என விடாப்பிடியாகப் போராடுவதற்காக லட்சக்கணக்கான வழக்குகளைச் சந்திக்கும் மக்களுக்கு என்ன அமைதி நிம்மதி இருக்கிறது?

தாது மணல் ஆற்று மணல் மாஃபியாக்கள், முதலாளித்துவ அரசியலோடு, ரியல் எஸ்டேட்டோடு தொடர்புடைய, பஞ்சாயத்து உள்ளிட்ட பொதுப் பணத்தை சூறையாடும் குற்றக்கும்பல்கள் சுதந்திரமாக உலாவும்போது, முன்னாள் டிஜிபி வீட்டின் முன் முருங்கைக் கீரை பறித்தவரைப் பிடித்து உள்ளே போட, மீசையை முறுக்கிக் கொண்டு பத்து பேர் கொண்ட தனிப்படையை அமைத்தது தமிழக காவல்துறை. டாஸ்மாக் கடைகளால் பதின்பருவத்திலிருந்து மூத்த வயது வரை குடிப்பழக்கத்திற்கு ஆளாகி சீரழிந்து அமைதியையும் மக்கள் இழப்பது, கழகங்களால் தமிழகத்துக்கு தரப்பட்ட கொடையாகும்.

அமைதியை மீட்க, ஜெயலலிதாவிற்கு ஒருவர் அற்புதமான முன்னுதாரணமாக இருக்கிறார். புதுக்கோட்டை மாவட்டம் மாத்தூர் காவல்நிலைய எல்லைக்குள் குற்றமய நடவடிக்கைகள் அதிகரிக்க தீய ஆவிகளே காரணம் எனக் கருதிய ஆய்வாளர் மாரிமுத்து, தீய ஆவிகளை விரட்டி அமைதியைக் கொண்டு வர, ‘சிவாச்சாரியார்களைக்’ கொண்டு வந்து ‘கணபதி ஹோமத்தை’ காவல் நிலையத்திற்குள் நடத்தியுள்ளார்.

தமிழகத்திற்கு அமைதி திரும்ப, இந்தியாவெங்கும் அமைதி திரும்ப, எத்தனை கணபதி ஹோமங்கள் எத்தனை சிவாச்சாரியார்கள் தேவை எனக் கணக்கெடுக்கும் வேலையை ஜெயலலிதா தினமணி, தினமலர் நாளேடுகளுக்குத் தரலாம்.

வளமை, முன்னேற்றம். இந்த வார்த்தைகள், இந்தியா ஒளி வீசுகிறது எனச் சொல்லி வாங்கிக் கட்டிக் கொண்ட பாஜகவை, நமக்கு நினைவுபடுத்துகின்றன. ஒரு கோடிக்கும் மேற்பட்ட விவசாயத் தொழிலாளர்களுக்கு, 150 நாட்கள் வேலை ஓராண்டில் உறுதி செய்யப்பட்டதா?

ரூ.148 நாள் கூலி உறுதி செய்யப்பட்டதா? வீடற்றவர்களுக்கு வீட்டுமனை தரப்பட்டதா? கல்வி மருத்துவம் போக்குவரத்து கட்டுப்படியாகிறதா? தொடர்ச்சியாய் மின்சாரம் இருக்கிறதா? முள்ளிவாய்க்கால் முற்றம் அமைத்தவர்களிலிருந்து லயோலா கல்லூரி மாணவர்கள் வரை, ஜனநாயகம் இருப்பதாக ஒப்புக்கொள்வார்களா? ஒப்பந்த, பயிற்சி தொழிலாளர்கள், தொழிற்சங்க உரிமை மறுக்கப்படும் தொழிலாளர்களிடம், வளமை முன்னேற்றம் அமைதி எனப் பேசினால், அவர்கள் காதுகளில் பழுக்கக் காய்ச்சிய இரும்பை ஊற்றுவதாக இருக்காதா?

ஆனால் ஜெயலலிதா ஆட்சியில், ஹுண்டாய் போன்ற பன்னாட்டு இந்நாட்டு முதலாளிகளுக்கு, ஆதிக்க சாதியினருக்கு, கிராமப்புற மேட்டுக்குடியினருக்கு, நிதி சூதாட்ட ஒட்டுண்ணிகளுக்கு, ஊழல் அரசியல்வாதிகளுக்கு அதிகாரிகளுக்கு சாந்தம் சௌக்கியம் முன்னேற்றம் எல்லாமே உண்டு. ஜெயலலிதா, தமிழ்நாட்டைப்படுத்துகிறபாடு, இந்தியாவிற்கு நிச்சயம் வேண்டாம்.

ஜெயலலிதா, நாளை மோடி - பாஜக - தலைமையிலான தேஜமுன்னணிக்கு ஆதரவு தர மாட்டார் என இகக, இககமாவால் சொல்ல முடியுமா? நாளை அமையப்போகும் புதிய மத்திய அரசில், பெரும்தொழில் குழும எதிர்ப்பு மக்கள் சார்பு கொள்கைகள் இருக்க வேண்டும் என ஜெயலலிதா வாதாடுவாரா? இகக, இககமா இந்தப் பிரச்சனைகளில் ஜெயலலிதா பற்றி தமிழக மக்களுக்கு உறுதி கூறுவது இருக்கட்டும்; நமது இடதுசாரி அணிகளுக்கு அம்மா பற்றி தயக்கமின்றி உறுதி கூற முடியுமா?

தோழர் டி.கே. ரங்கராஜன் போன்றவர்கள் ஜெயலலிதாவிற்கு மதச்சார்பற்ற மக்கள் சார்பு நவதாராளவாத எதிர்ப்பாளி முகமூடிகளை அணிவிக்காமல் இருப்பது நல்லது. ஜெயலலிதா சாமர்த்தியமானவர். அவர் ராஜஸ்தான், மத்தியபிரதேசம், சட்டிஸ்கர், டெல்லி சட்டமன்றத் தேர்தல் முடிவுகள் பற்றிக் கருத்து சொல்லவில்லை.

தோழர்கள் எவ்வளவு முயன்றாலும், ஜெயலலிதாவையும் நாசகரமான நவதாராளவாதக் கொள்கைகளையும் பிரித்து நிறுத்த முடியாது.

முதலாளித்துவப் பொருளாதாரம், முதலாளித்துவ அரசியல், இந்துத்துவா, சாதி ஆதிக்கம் என்பவை அஇஅதிமுகவின் அடிப்படைப் பண்புகள். இவற்றை எதிர்த்து சுதந்திரமாக இடதுசாரி ஜனநாயக சக்திகள் போராடுவதன் மூலம்தான், தமிழக மக்களுக்கு இந்திய மக்களுக்கு, அமைதி வளமை முன்னேற்றம் கிடைக்கும். ஜெயலலிதாவின் செங்கோட்டை எக்ஸ்பிரஸ் தேச விரோதமானது, மக்கள் விரோதமானது.

தோழர்கள் தொற்றிக் கொண்டு இடம் பிடிக்கப் பார்க்காமல் இருப்பது நல்லது. டெல்லியில், ஓர் ஆம் ஆத்மி கட்சிக்கு இடம் உண்டென்றால், தமிழக மக்கள், தமக்காகப் போராடும் இடதுசாரி ஜனநாயக சக்திகளுக்கு வாய்ப்பு தராமலா போய்விடுவார்கள்?

89 மற்றும் 4.3

தமிழகத்தில் 89 லட்சம் வீடுகள் ஆண்டுக்கு 5,000 மில்லியன் யூனிட் மின்சாரம் பயன்படுத்துகின்றன. ஆனால், வெறும் 4.30 லட்சம் வீடுகள் ஆண்டுக்கு 4,300 மில்லியன் யூனிட் மின்சாரம் பயன்படுத்துகின்றன.

‘சிறந்த ஏற்றுமதியாளர்’

அரிய மணல் வளம்கொண்ட இருக்கன்துறை என்ற கடலோர கிராமத்தில், 100 ஏக்கர் அரசு நிலம் ஆண்டுக்கு வெறும் 16 ரூபாய்க்கும் 40 ஏக்கர் நிலம் வெறும் 9 ரூபாய்க்கும் விவி மினரல்ஸ் வைகுண்டராஜனுக்கு குத்தகைக்கு விடப்பட்டுள்ளன.

ஒரு டன் இரும்புத் தாதுவை ரூ.27க்கு வாங்கி, சர்வதேச சந்தையில் ரூ.7,000க்கு விற்பவர்களுக்கு, மத்திய அரசின் ‘சிறந்த ஏற்றுமதியாளர்’ விருது காத்திருக்கிறது.

2014க்கான மத்திய கமிட்டியின் அறைகூவல் அனைத்தும் 2014 பெரிய போர் நோக்கி... அனைத்தும் மக்களின் வெற்றிகரமான அறுதியிடலுக்காக...

வெகுமக்கள் அறுதியிடலின் ஓர் உயர்ந்த உணர்வுடன் 2013 துவங்கியது. அந்த விசை ஆண்டு முழுவதும் தொடர்ந்தது. ஒரு டில்லி பேருந்தில் நிர்பயா மிருகத்தனமாக கூட்டுப் பாலியல் வன்முறைக்கு உள்ளாக்கப்பட்ட டிசம்பர் 16 சம்பவத்தால் தூண்டப்பட்ட இதுவரை காணப்படாத இளைய இந்தியாவின் எழுச்சி, பாலியல் வன்முறை மற்றும் வேறு பல வடிவங்களிலான பாலியல் துன்புறுத்தலுக்கு எதிராக, ஒரு கறாரான, இன்னும் கூருணர்வு மிக்க சட்டத்தை நிறைவேற்ற நாடாளுமன்றத்தை நிர்ப்பந்தித்தது.

ஆண்டு முடிகிற நேரத்தில், ஆணாதிக்க பிற்போக்கு சக்திகளுக்கும் நடவடிக்கைகளுக்கும் எதிராக, ஒவ்வொரு முனையிலும் இந்தியப் பெண்கள் சக்திவாய்ந்த சவால் விடுப்பதை நாம் காணமுடிகிறது. ஒரு சாமியார், ஒரு பிரபல பத்திரிகையாளர், ஓர் ஓய்வுபெற்ற உச்சநீதிமன்ற நீதிபதி உட்பட சக்தி வாய்ந்த ஆண்களை, அவர்களது உயர்பீடத்தில் இருந்து கீழே இறக்கி, நாட்டில் உள்ள சட்டங்களையும் நிறுவனங்களையும் விழிக்கச் செய்து, அதிகாரம், ஆளுமை, செல்வாக்கு பெற்ற ஆண்கள் தங்கள் கேள்விக்குட்படுத்தப் பட முடியாத தனிச்சலுகை என்று கருதிய பாலியல் வன்முறை, பாலியல் துன்புறுத்தல் வழக்குகளில் செயல்படச் செய்தது.

2013, உண்மையில், அமைப்புக்குள்ளூர இருக்கிற அநீதிக்கெதிரான, உத்வேகம் தரும் எதிர்ப்பின் ஆண்டாக இருந்தது. இந்த எதிர்ப்பு, ஒடுக்குமுறை சக்திகளுக்கு எதிராக ஒரு சக்தி வாய்ந்த செய்தியைச் சொன்ன அதேநேரம், இதுவரையிலும் அமைப்பாகாத, ஈடுபடாத மக்கள் பிரிவினரை மாற்றத்துக்காக ஈடுபட, அமைப்பாக உத்வேகம் தந்த அதேநேரம், ஊடகங்கள், நீதித்துறை மற்றும் நாடாளுமன்ற, சட்டமன்றங்கள், வெகுமக்கள் எதிர்ப்புக்களின்  அதிகரித்து வருகிற சக்தி மற்றும் விசைக்கு பதில்வினையாற்ற நிர்ப்பந்திப்பதில் வெற்றி பெற்றது.

ஒடிஷாவின் நியாம்கிரி மலைகளில் உள்ள வேதாந்தாவின் பாக்சைட் சுரங்கத் திட்டத்தை உச்சநீதிமன்றம் கிராமசபை முடிவுகளுக்கு உட்படுத்தியது, மாநில அரசாங்கத்தால் அடையாளம் காணப்பட்ட 12 கிராமசபைகளும் அந்தத் திட்டத்தை ஒருமனதாக நிராகரித்தது, வெகுமக்கள் எதிர்ப்பு நீதித்துறையால் அங்கீகரிக்கப்பட்டதன் உச்சபட்ச தருணங்களில் ஒன்றாகும்.

வெகுமக்கள் எதிர்ப்புக்களின் முன், நிலம் கையகப்படுத்துதல் தொடர்பான காலனிய சகாப்தத்துச் சட்டத்தை அரசாங்கம் ரத்து செய்ய நேர்ந்தது. 1894 நிலம் கையகப்படுத்துதல் சட்டத்தின் இடத்தில் புதிய சட்டத்தை கொண்டு வந்தது. நிலம் கையகப்படுத்துதலுக்கு எதிரான விவசாயிகள் மற்றும் பழங்குடியின மக்களின் சீற்றமும் எதிர்ப்பும் வலுப்பெற்றதற்கு பழையச் சட்டம் ரத்து செய்யப்பட்டது சாட்சியாக இருந்தது என்றாலும் விவசாய நிலத்தை பாதுகாப்பது என்ற விவசாய சமூகத்தின் கருவான கோரிக்கையை புதிய சட்டம் தொடர்ந்து நிராகரிக்கிறது.

நிலம் கையகப்படுத்துதலில் அரசின் பாத்திரத்தை சுருக்கி நிறுத்தி, அரசு நிலம் கையகப்படுத்துகிறது என்றால் நிலத்தை இழப்பவர்களுக்கு ஒப்பீட்டுரீதியில் கூடுதல் இழப்பீடு உறுதி செய்கிறது என்ற போதிலும், அது உண்மையில் நிலம் கையகப்படுத்துதலுக்கான வாய்ப்புக்களை விரிவுபடுத்தி, நெருக்கடியில் தள்ளப்பட்டுள்ள விவசாய சமூகத்தை, வெவ்வேறு காரணங்கள் சொல்லி முடிந்த அளவுக்கு நிலத்தை கைப்பற்றிக்கொள்ள காத்திருக்கும் ஆட்கொல்லி கார்ப்பரேட் மூலதனத்தின் காலடிகளில் கிடத்துகிறது.

அதேபோல், வெகுமக்கள் நிர்ப்பந்தத்தால் நிறைவேற்றப்பட்டுள்ள லோக்பால் மசோதாவும் பிரச்சனையின் அடிவேரான, பெருந்தொழில் மற்றும் அரசு அதிகாரம் ஆகியவற்றுக்கு இடையிலான சிக்கலான கூட்டு என்பதை தொடாமல், ஒரு புதிய நிறுவன கட்டமைப்பை உருவாக்குவது என்று பாதி தூரமே சென்றுள்ளது. ஊழலுக்கு எதிரான நம்பகத்தன்மை மிக்க, திறன்வாய்ந்த தடுப்புச்சுவர் என்று முன்னிறுத்தப்படுகிற லோக்பால் சட்டத்தில் இருந்து, அனைத்து சமீபத்திய ஊழல்களிலும் பெரும் ஆதாயம் பெற்ற கார்ப்பரேட் மூலதனத்துக்கு, பளிச்சென தெரியும் விதம், விலக்கு அளிக்கப்பட்டுள்ளது.

கொள்கைகளில் வரையறை மாற்றம் இல்லாமல் ஆட்சிமுறையை நம்பகத்தன்மைமிக்க விதத்தில் சுத்தப்படுத்த முடியாது; கார்ப்பரேட்டுகளை மய்யமாகக் கொண்ட கொள்கைகளின் இடத்தில் மக்களை மய்யமாகக் கொண்ட கொள்கைகள் வர வேண்டும்; ஆட்சி முறை வெளிப்படையானதாக, பொறுப்பேற்பதாக மாற வேண்டும்.

கோல்கேட் ஊழலில் சிபிஅய் விசாரணை நடந்த பின்னணியில், சிபிஅய் அதன் எல்லைகளுக்குள் நிற்க வேண்டும் என்றும் நிர்வாகப் பிரிவினரின் தனி உரிமையான கொள்கைகளை கேள்விகளுக்கு உட்படுத்தக் கூடாது என்றும் சொன்னபோது, பெரும்பாலான சமீபத்திய ஊழல்களின் வேர் தாராளமய, தனியார்மய கொள்கைகளே என்பதை மன்மோகன் சிங்கும் சிதம்பரமும் மறைமுகமாக ஒப்புக்கொண்டுள்ளனர்.

மாற்றத்துக்கான வெகுமக்கள் வேட்கை, தேர்தல் அரங்கிலும் தனது இருத்தலை உணரச் செய்துள்ளது. சங் படை, முசாபர்நகரில் காணப்பட்டது போல், கலவரங்களை மூட்டி சூழலைக்கெடுத்து, முழுவதுமாக நம்பகத்தன்மை இழந்து விட்ட, கிட்டத்தட்ட செயலிழந்துபோன காங்கிரசுக்கு மாற்றாக, பிரதமர் வேட்பாளர் நரேந்திர மோடி தலைமையிலான வெறிபிடித்த பாஜகவை முன்னிறுத்தி, மாற்றத்துக்கான வெகுமக்கள் மனநிலையை தன்வயமாக்க மூர்க்கத் தனமாக முயற்சி செய்யும்போது, காங்கிரஸ் - பாஜக அடைப்புக்கு அப்பால் மாற்றத்துக்கான அதிகரித்து வருகிற வேட்கை டில்லி சட்டமன்ற தேர்தல்களில் திகைப்பூட்டும்  விதம் வெளிப்பட்டது.

துவங்கப்பட்டு ஒரு வருடமே ஆன ஒரு கட்சி, தேசத்தின் தலைநகரத்திலேயே அது போன்ற ஒரு கண்கவர் துவக்கத்தை நிகழ்த்த முடியும் என்பது, முதலாவதாகவும் முதன்மையானதாகவும், ஆளும் கட்சிக்கு எதிரான மக்கள் சீற்றத்தை மட்டுமின்றி, மிகவும் முக்கியமாக, ஆக்கபூர்வமான மாற்றத்துக்கான, மக்களை மய்யம் கொண்ட கொள்கைகளுக்கான, மக்களை மய்யம் கொண்ட அரசியலுக்கான மக்கள் விருப்பத்தின் தீவிரத்தை காட்டுகிறது.

தகவல் தொடர்பு திறமைகள், இணையதள போர்த்தந்திரம், ஆதாரங்களை திரட்டிக் கொள்ளும் ஆற்றல் என அனைத்தும் இருந்தபோதும், ஆம் ஆத்மி கட்சி, அது செய்தது போல், டில்லியின் உழைக்கும் மக்கள் மத்தியில் ஓர் அடிப்படை உணர்வை தொடாமல், இது போன்ற ஒரு சக்திவாய்ந்த உள்நீரோட்டத்தை உருவாக்கியிருக்க முடியாது.

வெறும் லோக்பால் நிகழ்ச்சிநிரலைச் சுற்றி என்று மட்டும் நின்று விடாமல், மின்சாரம் மற்றும் தண்ணீர், கல்வி மற்றும் சுகாதாரம் போன்ற பிரச்சனைகளையும் கையிலெடுத்தது, அதன் துவக்க அடித்தளமான நடுத்தர பிரிவினரின் ஆதரவு மற்றும் நல்லெண்ணம் ஆகியவற்றுக்கு அப்பால் டில்லியின் நகர்ப்புற வறியவர்கள் மற்றும் உழைக்கும் மக்கள் மத்தியில் ஆழமாக உட்செல்ல உதவியது.

அதை தொடர்ந்த மாற்றங்கள் தெளிவாக காட்டுவதுபோல், ஆளும்வர்க்க மேட்டுக்குடிக்கு லோக் பால் என்ற பிரச்சனையில் எந்த அடிப்படை பிரச்சனையும் இல்லை (அதன் சுதந்திரத்தின் அளவு, அதன் அதிகாரத்தின் எல்லைகள் ஒரு பிரச்சனையாக இருக்கக் கூடும்); ஆனால், டில்லி வாக்காளர்களுக்கு ஆம் ஆத்மி கட்சி அளித்த வாக்குறுதிகள் சாசனத்தில் மேலோங்கிய விதத்தில் தெரிகிற பிரச்சனைகளான மலிவான மின்சாரம், சுத்தமான தண்ணீர், தரமான கல்வி, அனைவருக்கும் மருத்துவம் அல்லது, ஒப்பந்தத் தொழிலாளர்களை நிரந்தரப்படுத்துவது சமவேலைக்கு சமஊதியம் என்ற கோட்பாட்டை அமலாக்குவது ஆகியவை அதற்கு தெளிவாக பிரச்சனைக்குரியவையே.

அரசியல்ரீதியாக, ஆம் ஆத்மி கட்சியின் எழுச்சியும் வளர்ச்சியும் வலுவான காங்கிரஸ் எதிர்ப்பு தன்மை கொண்டிருந்தது. ஆனால், விந்தை முரணாக, டில்லியில் அடுத்த ஆட்சியை அமைக்க காங்கிரஸ் நிபந்தனையற்ற ஆதரவு தர தயாராக இருக்கும்போது, அது இப்போது பாஜகவுக்கு எதிராக தன்னை நிறுத்திக் கொள்ளும் நிலையில் உள்ளது.

தேர்தலுக்குப் பிந்தைய இந்தக் கட்டத்தையும், குறிப்பாக, 31% ஆம் ஆத்மி கட்சி ஆதரவாளர்கள் நரேந்திர மோடி பிரதமராக விருப்பம் தெரிவித்துள்ளதாக சொல்லப்படும்போது, பாஜகவுடனான அதன் போட்டியையும், ஆம் ஆத்மி கட்சி எப்படி கையாளப் போகிறது என்று பார்க்க வேண்டி யுள்ளது. ஓர் அரசியல் ஆளுமையாக ஆம் ஆத்மி கட்சி எப்படி உருவானாலும், அதன் எழுச்சி, இருக்கிற நிலைமைகளின் பலவீனத்தை அம்பலப்படுத்தியுள்ளது; மக்கள் உரிமைகளை வென்றெடுக்கும், கார்ப்பரேட் சூறையாடலில் இருந்து நாட்டின் செல்வாதாரங்களை பாதுகாக்கும் ஓர் ஆக்கபூர்வமான போராட்டமாக ஊழல் எதிர்ப்பு இயக்கம் மாற்றப்பட வேண்டிய தேவையை முன்னிறுத்தியுள்ளது.

இங்குதான் புரட்சிகர கம்யூனிஸ்டுகள் துணிச்சலுடன் தலையிட வேண்டியுள்ளது; அவர்கள் ஆற்ற வேண்டிய பாத்திரத்தை ஆற்ற வேண்டியுள்ளது; மாறுகிற சூழல், மக்களின் ஆக்கபூர்வமான விருப்பங்கள் மற்றும் ஆற்றல் ஆகியவற்றில் இருந்து சக்தி பெற்று, எல்லா தடைகளையும் உடைத்து இயக்கத்தை முன்னகர்த்திச் செல்ல வேண்டும்.

2013 நெடுக, இகக மாலெ தாக்கம் செலுத்தும் தொடர் முன்முயற்சிகள் எடுத்துள்ளது. பாலியல் வன்முறை எதிர்ப்பு இயக்கத்தில் ஒரு சக்தி வாய்ந்த ஆற்றல்மிக்க தலையீடு மற்றும் இந்திய தொழிலாளர் வர்க்கத்தின் வரலாற்றுச் சிறப்பு மிக்க பிப்ரவரி பொது வேலைநிறுத்தத்தில் உறுதியுடனான, அமைப்பாக்கப்பட்ட பங்கேற்பில் துவங்கி, கட்சி ராஞ்சியில் தனது ஒன்பதாவது காங்கிரசை வெற்றிகரமாக நடத்தியது; அதன் வளர்ந்துவருகிற பன்முகப்பட்ட நடைமுறையை திசைவழிப்படுத்த, மேலும் வளர்த்தெடுக்க, செழுமையான வழிகாட்டுதல்களை அங்கு வடிவமைத்தது.

ஜவஹர்லால் நேரு பல்கலை கழகம் மற்றும் டில்லி பல்கலை கழக மாணவர் தேர்தல்களில் அகில இந்திய மாணவர் கழகம் பெரும் வெற்றி பெற்றது; ஜவஹர்லால் நேரு பல்கலை கழக மாணவர் சங்கத்தின் அனைத்து பதவிகளிலும் வெற்றி பெற்றது; டில்லி பல்கலை கழகத்தில் ஒரு திறன்மிக்க மூன்றாவது சக்தியாக எழுந்தது. ஒரு விதத்தில், மாணவர் சங்க தேர்தல்கள், டில்லியில் மாறிக்கொண்டிருக்கிற அரசியல் மனநிலையின் ஆரம்ப பிரதிபலிப்பாக இருந்தன; காங்கிரஸ் - பாஜக இருதுருவ நிலைக்கு அப்பால் ஒரு மூன்றாவது சக்தியை வரவேற்க மக்கள் எதிர்நோக்கியிருந்தனர்.

பீகாரில் பாஜக - அய்க்கிய ஜனதா தள பிளவை தொடர்ந்து, இரண்டு கட்சிகளும் அவர்களுடைய புதிய போட்டி மற்றும் பகையைச் சுற்றி அரசியல் காட்சியை ஒரு துருவப்படுத்த தங்களால் ஆன அளவு முயற்சி செய்தன.

இகக மாலெ தலைமையிலான நீடித்த கிளர்ச்சிகள் மற்றும் முன்முயற்சிகள் இந்த ஒருதுருவப்படுத்துதலை தடுத்து, பாஜக வின் நிலப்பிரபுத்துவ மதவெறி தாக்குதலை எதிர்கொள்ளும் சக்திவாய்ந்த இடதுசாரி அறுதியிடலுக்கு அடித்தளம் இட்டதுடன், செயலற்று இருக்கிற நிதிஷ்குமார் அரசாங்கத்துக்கு ஒவ்வோர் அரங்கிலும் சவால் விடுத்தன.

பாட்னாவில் அக்டோபர் 30 அன்று நடந்த எச்சரிக்கைப் பேரணியில் கட்சியின் அணிகள் வெளிப்படுத்திய பிரம்மாண்டமான துணிவு, அக்டோபர் 27 அன்று நரேந்திர மோடியின் கர்ஜனைப் பேரணியில் குண்டு வெடிப்புகள் நிகழ்ந்ததை ஒட்டி, பயங்கர சூழலையும் வெறிக்கூச்சலையும் உருவாக்கும் நோக்கம் கொண்ட பாஜகவின் தீயசதியை திறன்மிக்க விதத்தில் முறியடித்தது.

நிதிஷ் குமார் அரசாங்கத்தின் ஒடுக்குமுறை ஆட்சி, தொடர்ச்சியாக நீதி படுகொலை செய்யப்படுவது மற்றும் படுகொலை குற்றவாளிகள் தண்டனையில் இருந்து விடுவிக்கப்படுவது, தீவிரவாதிகள் எதிர்ப்பு நடவடிக்கைகள் என்ற பெயரில் இசுலாமிய இளைஞர்கள் வேட்டையாடப்படுவது ஆகியவற்றுக்கு எதிராக, நீதிக்கான அனைத்தும் தழுவிய இயக்கத்தை கட்சி திறன்மிக்க விதத்தில் கட்டியெழுப்பியது.

படுகொலையில் உயிர் பிழைத்தவர்களுக்கு நீதி மற்றும் ஆமீர்தாஸ் ஆணையம் மீண்டும் அமைக்கப்பட வேண்டும் என்ற கோரிக்கைகளுடன் லட்சக்கணக்கான கையெழுத்துக்கள் பெறப்பட்டது, பீகாரில் நீதி மற்றும் ஜனநாயகத்துக்கான ஒடுக்கப்பட்ட வறிய மக்களின் நீண்ட போராட்டத்தில் ஒரு புதிய உயரத்தை குறிக்கிறது.

முழுவதுமாக நம்பகத்தன்மையிழந்துவிட்ட காங்கிரஸ் வெகுவேகமாக தனது அடித்தளத்தை இழந்துகொண்டிருக்கும்போது, பாஜக, மத்தியில் ஆட்சியைப் பிடிக்க ஒரு மூர்க்கமான இயக்கத்தை கட்டவிழ்த்துவிட்டுள்ளது. பிராந்திய கட்சிகள் தங்கள் சொந்த செல்வாக்கு பகுதிகளைக் கொண்டுள்ளன; அவற்றில் சிலவற்றை தவிர, பெரும்பாலான கட்சிகள் கடந்த காலத்தில் பாஜகவுடன் கூட்டணி அமைக்க தயாராக இருந்துள்ளன. சங் படையின் மதவெறி பாசிச நிகழ்ச்சிநிரலுக்கு மிகவும் துணிச்சலான, நம்பகத் தன்மைமிக்க கருத்தியல் எதிர்ப்பை வரலாற்று ரீதியாக இடதுசாரிதான் தெரிவித்து வந்துள்ளது; ஆனால், மேற்குவங்கத்தில் இககமாவின் சரிவும் இககமாவும் இககவும் கடைபிடித்து வரும் சந்தர்ப்பவாத செயல்தந்திர வழியும் தேசிய அளவில் இடதுசாரி முகாமை பலவீனப்படுத்தியுள்ளன.

இந்த நெருக்கடியான கட்டத்தில் இகக மாலெ பெறுகிற ஒவ்வொரு ஆதாயமும், பாஜக வின் பாசிச இயக்கத்துக்கும் ஆளும் வர்க்கங்களின் கார்ப்பரேட் ஆதரவு கொள்கைகளுக்கும் ஒரு சக்திவாய்ந்த எதிர்ப்பாக இருக்கும். கட்சி முன்னோக்கிச் செல்லும் ஒவ்வோர் அடியும் மக்கள் போராட்டங்களின் வெற்றியாக அமையும்; சங் படையின் வளருகிற தாக்குதலுக்கு எதிராக இடதுசாரிகளின் புத்தெழுச்சிக்கு வழிவகுக்கும். அனைத்தும் 2014 பெரிய போர் நோக்கி; அனைத்தும் மக்களின் வெற்றிகரமான அறுதியிடலுக்காக.

மத்திய கமிட்டி
இகக (மாலெ) விடுதலை

மோடி நிகழ்வுப்போக்கு: தேவை ஒரு சக்திவாய்ந்த இடதுசாரி பதில் - திபங்கர் பட்டாச்சார்யா

நரேந்திர மோடியை அதிகாரபூர்வமாக பிரதமர் வேட்பாளராக அறிவித்த பிறகு பாஜக எதிர்கொண்ட முதல் முக்கிய சோதனை மத்தியபிரதேசம், சட்டிஸ்கர், ராஜஸ்தான் மற்றும் டில்லி மாநில சட்டமன்ற தேர்தல்கள் தான்.

இந்தத் தேர்தல்களில் பாஜக சிறப்பாகவே செயல்பட்டுள்ளது. மத்தியபிரதேசம் மற்றும் சட்டிஸ்கரை தக்க வைத்துக் கொண்டுள்ளது. பெரும் வாக்கு வித்தியாசத்தில் காங்கிரசிடம் இருந்து ராஜஸ்தானை தட்டிப் பறித்துள்ளது; முதல் முறையாக தேர்தலில் நின்ற ஆம் ஆத்மி கட்சி டில்லியில் தெளிவான பெரும்பான்மை பெறுவதை தடுத்துள்ளது.

ராஜஸ்தானிலும் மத்தியபிரதேசத்திலும் பாஜக பெற்றுள்ள வெற்றிகள் எதிர்பார்த்ததை விட அழுத்தமானதாக இருந்தது; மற்ற இரண்டு மாநிலங்களிலும் கட்சி பெற்ற வாக்குகள் தாக்கம் செலுத்தும் விதம் இருந்தாலும், கட்சியின் நட்சத்திர பிரச்சாரகர் மற்றும் அறிவிக்கப்பட்ட பிரதமர் வேட்பாளரான நரேந்திரமோடி தான் இந்த வெற்றிக்கு காரணம் என்று சொல்ல முடியுமா என்பதில் மாறுபட்ட கருத்துக்கள் உள்ளன.

மோடியின் உயர்தோற்ற பிரச்சாரமும் தீவிரமான உரைவீச்சும் சட்டிஸ்கரிலும் டில்லியிலும் எந்தத் தாக்கமும் உருவாக்கவில்லை என வாதிட முடியும். ஆனால், இந்த இரண்டு மாநிலங்களில் மோடி விரிவான பிரச்சாரம் மேற்கொள்ளாமல் இருந்திருந்தால் பாஜக இன்னும் மோசமான வாக்குகள் பெற்றிருக்கும் என்று மோடி ஆதரவாளர்களும் சொல்ல முடியும்.

மோடி உண்மையில் தேர்தல்ரீதியாக எவ்வளவு தாக்கம் உருவாக்குகிறார் என்பதை தேர்தல் ஆய்வாளர்களும் ஊடக ஆய்வாளர்களும் பார்த்துக் கொள்ளட்டும்; பிரதமர் - மோடி என்ற பிரச்சாரத்தின் அரசியல் உள்ளடக்கம் மற்றும் திறன்மிக்க விதத்தில் எதிர்கொள்ள வேண்டியுள்ள சங் போர்த்தந்திரத்தின் வெவ்வேறு பரிமாணங்கள் பற்றி நாம் கவனம் குவிக்க வேண்டும்.

பாஜகவில் மெத்த அனுபவம்மிக்க தலைவரான அத்வானி உட்பட, சில மூத்த பாஜக தலைவர்கள் தெரிவித்த அதிருப்தி கருத்துக்கள் இருந்தபோதும், மொத்த சங் பரிவாரத்தின் கேள்விக்குட்படுத்தப்படாத தலைவராக மோடி எழுந்துள்ளார். பாஜகவின் பிரதமர் வேட்பாளராக மோடி அறிவிக்கப்பட்டதால் செயலூக்கம் பெற்று, மதவெறி துருவச் சேர்க்கை சூழலை உருவாக்கவும் இசுலாமியர் எதிர்ப்பு வெறியை தூண்டிவிடவும் ஒவ்வொரு சங் அமைப்பும் மிகைநேரப் பணியாற்றுகிறது.

முசாபர்நகர், இந்த விஷத்தனமான மதவெறி போர்த்தந்திரத்தின் மிகவும் கவலையளிக்கும் விளைவாகும்; ராஜஸ்தானிலும் கிராமப்புற டில்லியின் சில பகுதிகளிலும் சமீபத்திய தேர்தல்களின் வாக்கு விவரங்களில் தெளிவாக தெரிவதுபோல், இது கணிசமான ஜாட் மக்கள் தொகை இருக்கும் பகுதிகளில் பாஜகவுக்கு செழிப்பான தேர்தல் விளைவை அறுவடை செய்யத் துவங்கியுள்ளதாகத் தெரிகிறது.

1980களின் இறுதிப் பகுதியிலும் 1990களின் துவக்கத்திலும் மதவெறி அணிதிரட்டல் போர்த்தந்திரத்தை, பாஜக, பிரதானமாக அயோத்யாவைச் சுற்றி கட்டியெழுப்பியது. சங் குண்டர்கள் பாப்ரி மசூதியை தகர்த்த பிறகு, ராமர் கோயில் பிரச்சனை, முன்பிருந்த உணர்வெழுச்சி தன்மையை இழந்துவிட்டிருக்கலாம்.

இப்போது பாஜகவின் மதவெறி பிரச்சாரம், சமகாலத்திய இசுலாமியர் விரோத தப்பெண்ணங்கள் மற்றும் அய்க்கிய அமெரிக்காவால் தூண்டப்படும் இசுலாமிய பயம் காட்டும் அரசியல் ஆகியவற்றைச் சுற்றியே அமைந்துள்ளது. ‘காதல் ஜிஹாத்’ பற்றிய பிரச்சாரம், பங்களாதேஷில் இருந்து குடியேறுபவர்கள் வருகை பற்றிய பயம் காட்டுவது, பாகிஸ்தானில் இருந்து தீவிரவாதிகள் ஊடுருவுவது, இசுலாமிய மக்கள் தொகை பெருக்கம் என்ற புனைவு, பயங்கரவாதத்தின் பெயரால் இசுலாத்தை சாத்தான்மயமாக்குவது போன்றவை, பாஜகவின் தற்போதைய மதவெறி பிரச்சாரத்தின் முக்கியமான அம்சங்களாக இருக்கின்றன.

போலி மதச்சார்பின்மை, இசுலாமியர்களை திருப்திப்படுத்துவது, வாக்கு வங்கி அரசியல் என்று பாஜக அழைப்பதற்கு எதிரான விடாப் பிடியான பிரச்சாரத் தாக்குதல் இவற்றுடன் சேர்ந்து கொள்கிறது. காங்கிரசின் மென்மையான மதவாதம் மற்றும் பல பாஜக அல்லாத கட்சிகள் மதச்சார்பின்மை பெயரால் கடை பிடிக்கும் சந்தர்ப்பவாதம் ஆகியவற்றிலிருந்தும் பாஜக பிரச்சாரம் வலுப்பெறுகிறது.

மதச்சார்பின்மையை மலினமானதாக்குவதும் மதிப்பிழக்கச் செய்வதும் போலி மதச்சார்பின்மைக்கு எதிரான பாஜகவின் தொடர் தூற்றலுக்கு கூடுதல் வலுசேர்ப்பதில்தான் எப்போதும் முடியும்.


நமது ஒன்பதாவது கட்சி காங்கிரசில் நாம் சரியாக குறிப்பிட்டதுபோல், மோடி - பிரதமர் என்ற பிரச்சாரம் சங் பரிவார் அமைப்புக்களுடன் நின்றுவிடவில்லை. அது மொத்த கார்ப்பரேட் துறையாலும் ஏற்றுக்கொள்ளப்பட்டுள்ளது.

மோடிக்கான கார்ப்பரேட் கூக்குரல் சில காலமாகவே கட்டமைக்கப்பட்டு வருகிறது; முதலீட்டாளர்களின் அடுத்தடுத்த ‘துடிப்பான குஜராத்’ மாநாடுகளில் அது வளர்ந்து வருவதை நம்மால் கேட்க முடிகிறது. கார்ப்பரேட் விருப்பம், மேலோங்கிய ஊடக கருத்தை எப்போதும் வடிவமைக்கிறது; பெரும்பாலான ஊடக நிறுவனங்கள் 2014 மக்களவை தேர்தல்களை அய்க்கிய அமெரிக்க அதிபர் தேர்தல்கள்போல் காட்டுகின்றன; மோடி ஏற்கனவே ஊடகத்தின் பெரும் கவனத்தை பெற்றிருக்கும்போது, அவருடைய பேரணிகள் நேரடியாக ஒளிபரப்பப்படுகின்றன.

கார்ப்பரேட் நிறுவனங்கள் மோடியிடம் இருந்து ஓர் இரட்டை பரிசை எதிர்பார்க்கின்றன: எந்த நல்வாழ்வு நடவடிக்கைச் சுமையும் இல்லாமல் கார்ப்பரேட் நிகழ்ச்சிநிரலுக்கு ஆதரவாக, பொருளாதார கொள்கை சமநிலையை தீர்மானகரமாக மாற்றுவார் என்றும், கார்ப்பரேட்களுக்கு அளிக்கப்படும் விதிவிலக்குகள் மற்றும் கார்ப்பரேட் சூறையாடலுக்கு எதிரான போராட்டங்களை இரும்புக் கரம் கொண்டு ஒடுக்குவார் என்றும் கார்ப்பரேட் நிறுவனங்கள் எதிர்பார்க்கின்றன.


தற்போதைய சூழல், மோடிக்கான இந்த கார்ப்பரேட் - மதவெறி கூக்குரலை இன்னும் பரவலாக எதிரொலிக்கச் செய்கிறது. பெருவாரியான மக்கள் பிரிவினரை பாதிக்கும் கடுமையான பொருளாதார நெருக்கடியை நாம் எதிர்கொள்கிறோம்; இந்தியாவில் இதுவரை இல்லாத அளவிலான ஓர் ஊழல் அரசாங்கம் என்று பரவலாக மதிப்பிடப்படும் ஓர் அரசாங்கத்தை கொண்டுள்ளோம்.

காங்கிரஸ் கட்சி, கடுமையான நம்பகத்தன்மை மற்றும் தலைமை நெருக்கடியால் அதிகரிக்கப்பட்டுள்ள, ஒரு கடுமையான சரிவு கட்டத்தின் ஊடே சென்று கொண்டிருக்கிறது. அதனால், செயல்படக்கூடிய ஓர் அரசாங்கம், முடிவெடுக்கக் கூடிய ஒரு தலைமை ஆகியவற்றை மக்கள் தேட வேண்டிய நிலையில் உள்ளனர். எனவே, மோடி ஆதரவு முகாம், மக்களின் அனைத்து துன்பங்களுக்கும் ஒரேபதில் மோடி என்று அவரை விற்கப் பார்க்கிறது.

காங்கிரசின் இருப்புகள் இதுவரை இல்லாத அளவு குறைவாக இருப்பதை அறிந்துகொண்ட மோடி தனது உரை வீச்சு மூர்க்கத்தை அதிகரித்துள்ளார். மன்மோகன் சிங் அரசாங்கம் வெளியேற்றப்பட வேண்டும் என்று மட்டுமின்றி, ‘காங்கிரஸ் இல்லாத இந்தியாவை’ உருவாக்க அழைப்பு விடுக்கிறார். ‘அச்சம், பசி, ஊழல்’ ஆகியவற்றை போக்குவோம் என்பது  பாஜகவின் முழக்கமாக இருந்த காலம் இருந்தது; மோடி, காங்கிரஸ் தான் அனைத்து தீங்குகளுக்கும் வேர் என்று வண்ணம் பூசி காங்கிரசை ஒழிக்க வேண்டும் என்று அழைப்பு விடுக்கிறார். காங்கிரசுக்கு ஏற்பட்டுள்ள இழப்பு பிரதானமாக பாஜகவின் ஆதாயமாக மாறும் என்று அவர் நம்புகிறார்.

பிராந்திய கட்சிகளுக்கு இந்தியாவில் கணிசமான அரசியல் வெளி உள்ளது; பாஜகவுக்கு இன்னும் பல மாநிலங்களில் தேர்தல்ரீதியான இருத்தல் இல்லை. ஆனால், பல பிராந்திய கட்சிகளுடன் அரசியல் நடத்த முடியும் என்று பாஜகவுக்கு தெரியும். சில காலத்துக்கு முன் தேஜமுவில் அது 20க்கும் மேற்பட்ட கட்சிகளை கொண்டிருந்தது. இப்போது மோடி என்ன செய்து கொண்டிருக்கிறார் என்றால், தேஜமு கடந்த காலத்தில் கிடப்பில் போட்டுவிட்ட நிகழ்ச்சிநிரலை மீண்டும் திறந்து பார்க்கிறார்.

ஜம்முவில் ஒரு பேரணியில் பேசியபோது அரசியல் சாசன பிரிவு 370 பற்றி விவாதம் நடத்தப்பட வேண்டும் என்று சொல்கிறார். பாஜக, தான் வெற்றி பெறும் இடங்களின் எண்ணிக்கையை முக்கியத்துவம் வாய்ந்த விதத்தில் உயர்த்த முடிந்தால், அது கூட்டாளிகளை மீண்டும் ஈர்க்க முடியும் என்று, ஒரு தேசிய அளவிலான கூட்டணியை மீண்டும் உருவாக்க முடியும் என்று - அதுவும் கடந்த காலத்தைப் போலல்லாது, பாஜகவின் சொந்த நிகழ்ச்சி நிரலுக்கு நெருக்கமான பொருளில் - நம்புகிறது.

பாஜக தற்போது மேலெழுந்து வரும் கட்டத்தை, முந்தைய கட்டத்தில் இருந்து வேறுபடுத்தும் இன்னும் சில முக்கிய காரணிகள் உள்ளன. 1980 மற்றும் 1990களில் அத்வானியும் வாஜ்பாயியும் பாஜகவை கட்டி வழிநடத்தியபோது, அது சாரத்தில் ஓர் எதிர் கட்சியாக இருந்தது. உண்மையில், இந்திரா காந்தி படுகொலையை தொடர்ந்து, ராஜீவ் காந்திக்கு பொங்கி வழிந்த தேசியவாத அனுதா பத்தின் பின்னணியில், பாஜக நாடாளுமன்றத்தில் வெறும் 2 இடங்களே பெற்றது. ஷா பானு தீர்ப்பில் காங்கிரஸ் செய்த சமரசம், ராஜீவ் காந்தி மீதான ஊழல் புகாருடன் இணைந்து கொண்டு, பாஜக முன்நகர இடமளித்தது; பாஜகவும், தேசிய அரசியல் அரங்கில் பெரிய அளவில் அறுதியிட்டுக்கொள்ள, ராமன் என்ற உணர்வெழுச்சிமிக்க இதிகாச தோற்றத்தை பயன்படுத்தியது.

காந்தி பயன்படுத்திய நல்லாட்சி தந்த மன்னன் என்ற பிம்பமல்லாமல் போர் வீரன் ராமன் என்ற பிம்பத்தை பயன்படுத்தியது. 1998ல் அது மத்தியில் ஆட்சிக்கு வந்தபோதும் அரசதிகாரத்தின் மீது அதற்கு பெரிய அளவிலான பிடிமானம் எதுவும் இல்லை; அது பிரதானமாக ஓர் எதிர்க்கட்சி ஆட்சியைப் பிடிப்பதாகவே பார்க்கப்பட்டது.

ஆனால், கடந்த பத்தாண்டுகளில், பாஜக நாடாளுமன்றத்தில் எதிர்க்கட்சி இருக்கையில் அமர நேர்ந்திருந்தாலும், குஜராத், மத்தியபிரதேசம் மற்றும் சட்டிஸ்கரில் மாநில ஆட்சியில் இருந்தது. பீகார் போன்ற ஒரு பெரிய மாநிலத்தில் எட்டு ஆண்டுகள் ஆட்சியை பங்கிட்டுக் கொண்டது. குஜராத்தில் கட்சிக்கும் ஆட்சிக்கும் இடையிலான பிரித்து நிறுத்தும் கோடு கிட்டத்தட்ட அழிக்கப்பட்டுவிட்டது; மோடி, அரசு எந்திரத்தை ஓர் தனிநபர் அமைப்புபோல் பயன்படுத்துவதை நாம் பார்க்கிறோம். ஆட்சி நடத்தும் ஒரு கட்சியாக பாஜக உறுதிப்படுவது கட்சியின் ஒரு புதிய கட்டத்தை குறிக்கிறது. இந்த உறுதிபடுத்துதல் அரசு அதிகாரத்தை முறைப்படுத்தப்பட்ட விதத்தில் தவறாக பயன்படுத்தியதன் மூலம் பெருமளவில் எட்டப்பட்டது.

மனிதப் படுகொலை மற்றும் அதைத் தொடர்ந்து நடந்த தொடர் போலி மோதல் படுகொலைகள் ஆகியவற்றில், குஜராத் காவல் துறையை மோடி ஒரு தனிப்படைபோல் நடத்தியது, அத்துமீறி ஊடுருவி கண்காணிப்பது, வேவு பார்ப்பது ஆகியவை அவரது அரசாங்கத்தால் தொடர்ந்து நடத்தப்படுவது, சர்தார் வல்லபபாய் படேலின் வழிமரபை போற்றுவது என்ற பெயரில் தன்னை முன்செலுத்திக் கொள்ளும் மோடியின் திட்டத்தை நிறைவேற்றுவதில் கட்சியும் அரசாங்கமும் முழுமையாக ஒன்றிணைந்து இருப்பது ஆகிய அனைத்தும், அதிகாரத்தை தனித்து நிறுத்துவது தொடர்பான அரசியல் சாசன விதிகளை, குறுகிய கட்சிக் கட்டுப்பாட்டில் இருந்து பிரிக்கப்பட்ட, அரசு பொறுப்பேற்றல் மற்றும் சுதந்திர செயல்பாடு பற்றிய கோட்பாடுகளை முற்றிலும் புறந்தள்ளி, ஒரு கொடுங்கோன்மை தலைவரைச் சுற்றிய ஒரு சிறிய கும்பலின் கையில் அனைத்து அதிகாரமும் குவிந்திருக்கும் பாசிச போக்கை காட்டுகின்றன.


நாட்டு விடுதலை இயக்கத்தில், பழங்குடி மக்கள் கலகங்களில் துவங்கிய பல்விதமான தேசிய    விழிப்புணர்வு போராட்டங்களில், 1857 முதல் விடுதலைப் போரில், சங் பரிவாரத்துக்கு எந்த வேரும் இல்லை என்று மோடிக்கு தெரியும். எனவே, வரலாற்றை தன்வயமாக்கி, மத்தியில் ஆட்சியைப் பிடிக்கும் பாஜகவின் திட்டத்துக்கு அதை பயன்படுத்த அவர் வெறித்தனமாக முயற்சி செய்கிறார்.

சுவாமி விவேகானந்தரின் 150ஆவது பிறந்ததினம், மோடி தன்னை முன்செலுத்திக் கொள்ளும் ஒரு நிகழ்வாக குஜராத்தில் மாறியது; இப்போது அதே போன்ற ஒன்று சர்தார் படேல் வழிமரபு தொடர்பாகவும் நடத்தப்படுகிறது. மோடி பகத்சிங் வழிமரபுடன் கூட விளையாடப் பார்த்தார்; ஆனால் பகத்சிங்கின் புகழ்மிக்க புரட்சிகர ஏகாதிபத்திய எதிர்ப்பு வரலாறும், மதச்சார்பின்மை, சோசலிசம் மற்றும் ஒடுக்கப்பட்ட மக்களின், உழைக்கும் மக்களின் உண்மையான சுதந்திரம் ஆகிய போர்த்தந்திர இலக்குகளுடன் இணைக்கப்பட்ட முற்போக்கு தேசியவாதத்தை சக்திவாய்ந்த விதத்தில் முன்னிறுத்தியதும் பகத்சிங்கை பாஜகவுக்கு குறிப்பிடத்தக்க விதத்தில் பொருத்தமற்றவராக ஆக்குகிறது.

மோடியின் கார்ப்பரேட் மதவெறி பாசிச வகையை எதிர்ப்பதற்கு வேண்டுமானால், பகத்சிங் இந்திய இளைஞர்களுக்கு உழைக்கும் மக்களுக்கு ஜனநாயக அறிவாளிப் பிரிவினருக்கு ஓர் உள்ளாற்றல்மிக்க ஆயுதமாக இருக்க முடியும்.

சர்தார் படேல் என்ற திருவுருவை மிகவும் சிறப்பாக கையாள, தான் பொருத்தமானவர் என்று மோடி நம்புகிறார்;  படேலின் வலுவான வலதுசாரி பார்வை, எதேச்சதிகார அணுகுமுறை, மதவாதம் என்ற பிரச்சனையில் திட்ட வட்டமான நிலை எடுக்காதது, அவர் குஜராத்தைச் சேர்ந்தவர் என்பது, காந்தி, நேரு மற்றும் நேரு குடும்பத்தினரால் ஆதிக்கம் செலுத்தப்படுகிற காங்கிரஸ் கடவுளர் கூடத்தில் படேலுக்கு அங்கீகாரம் இல்லை என்று கருதப்படுவது ஆகியவை இதற்கு காரணமாக அமைகின்றன.

குஜராத்தில் சுதந்திரத்துக்கு முந்தைய விவசாயிகள் இயக்கத்தில் எழுந்த படேல், இந்தியாவின் சுதந்திரத்துக்காக பிரிட்டிஷ் காலனி ஆட்சியாளர்களுக்கு எதிராகப் போராடிய படேல், காந்தி படுகொலை செய்யப்பட்ட பிறகு, இந்தியாவின் முதல் உள்துறை அமைச்சராக ஆர்எஸ்எஸ் ஐ தடை செய்த படேல், இந்தியா போன்ற, ஒரு கண்டத்துக்குரிய பரிமாணங்கள் கொண்ட ஒரு நாட்டை ஒன்றுபடுத்துவதன் சிக்கல்களை புரிந்து கொண்ட படேல், இந்தியா போன்ற அளவு, பன்முகத் தன்மை, சிக்கலான தன்மை கொண்ட ஒரு நாட்டை புரிந்துகொண்டு அதற்கேற்ப செயல்படுவதற்கான வரலாற்று அல்லது கருத்தியல் பலம் இல்லாத சங் பரிவாரத்துக்காக உருவாக்கப்பட்டவர் அல்ல. ஆனால், இந்தியாவின் வளமையான இயற்கை செல்வாதாரங்களின் மீது கண் வைத்திருக்கும் கார்ப்பரேட் நிறுவனங்கள்போல், இந்திய வரலாற்றின் வெவ்வேறு அம்சங்களை பறித்துவிட மோடி வெறித்தனமாக முயற்சி செய்கிறார்.

வரலாற்றில் சில வேர்களை தனது என்று சொல்லப்பார்க்கும் பாஜகவின் முயற்சி, மோடியை ஒடுக்கப்பட்ட மக்களின் தலைவராக நிறுத்த அது எடுக்கும் முயற்சிகளை போன்றது. ஒவ்வொரு பேரணியிலும், கடின உழைப்பால் மட்டுமே அரசியலில் பெரிதாக சாதித்த ஒரு சாதாரண தேநீர் விற்பவர் என்று மோடி தன்னை முன்னிறுத்திக் கொள்கிறார்.

ஆர்எஸ்எஸ்ஸ÷ம் அதன் அனைத்து அமைப்புக்களும், மிகவும் பிற்படுத்தப்பட்ட சாதியிலிருந்து பிரதமர் இருக்கைக்குச் செல்லப் போகிற முதல் தலைவர் மோடியாகத்தான் இருப்பார் என்று பிரச்சாரம் செய்கின்றன.

இவ்வளவு காலமும் குஜராத்தின் செல்வச் செழிப்பை, இந்தியாவின் மிகவும் பின்தங்கிய, அனைத்தும் பறிக்கப்பட்ட பகுதிகளை ஏளனம் செய்ய பயன்படுத்திய ஒரு மனிதர் திடீரென ஒரு சாதாரண தேநீர் விற்பவராக மாறிவிட்டார்; பிற கட்சிகளின் சில இறுமாப்பு கொண்ட தலைவர்கள், தேநீர் விற்பவர்கள் பிரதமராக முடியாது என்று சொல்லி மோடியின் விளையாட்டில் சிக்கிக் கொள்கின்றனர். இந்தியாவின் நிலப்பிரபுத்துவ சக்திகள் மற்றும் கார்ப்பரேட் வட்டங்களின் முதல் விருப்பத் தேர்வான பாஜக, தேநீர் விற்பவர் என்ற மோடியின் பழமையான கடந்த காலத்தை பயன்படுத்தி வறியவர் ஆதரவு முகமூடி போட்டுக் கொள்ளப் பார்க்கிறது.

பாஜகவின் காதைத் துளைக்கும் உரைவீச்சு மற்றும் மூர்க்கத்தனமான மோடி - பிரதமர் என்ற பிரச்சாரம் ஆகியவற்றுக்கு திறன்மிக்க எதிர்ப்பை கட்டமைக்க, பாஜகவின் போர்த்தந் திரம் மற்றும் மோடி நிகழ்வுப்போக்கின் அடியோடுகின்ற பலம் மற்றும் பலவீனம் தொடர்பான அம்சங்களை புரிந்துகொள்ள வேண்டும்.

பலவீனமான, நம்பகத்தன்மையிழந்த காங்கிரஸ் மோடிக்கு பதில் தரமுடியாது என்பது தெளிவு; உண்மையில் காங்கிரஸ் தான் இன்று மோடியின் பலத்தின் மிகப்பெரிய ஆதாரம். அனைத்து விதமான சந்தேகத்துக்குரிய மற்றும் சந்தர்ப்பவாத சக்திகளுடன் ஒரு மகா கூட்டணி என்பதை முன்னிறுத்துவது பாஜகவின் பொறிக்குள் சிக்கிக்கொள்வதே ஆகும்.

மக்கள் பிரச்சனைகளை சக்திவாய்ந்த விதத்தில் முன்வைப்பது, ஊழல், கார்ப்பரேட் சூறையாடல், கடுமையான பொருளாதார நெருக்கடி ஆகியவற்றுக்கு எதிரான, அய்க்கிய அமெரிக்காவின் அறிவுரைப்படியான பொருளாதார மற்றும் அயலுறவு கொள்கைகளில் இருந்து விடுத லைக்கான, ஒடுக்குமுறை சக்திகள் மற்றும் கொள்கைகளுக்கு எதிராக ஜனநாயகம் மற்றும் நீதியை உறுதியாக பாதுகாப்பதற்கான, துணிச்சலான, விடாப்பிடியான போராட்டம் மட்டுமே மூர்க்கத்தனமான பாஜகவுக்கு ஓர் உண்மையான அரசியல் சவாலை முன்னிறுத்த முடியும்.

மோடி வெறும் ஒரு பழைய ஆர்எஸ்எஸ் மனிதர் அல்ல; அவர், இருபதாண்டுகால கார்ப்பரேட் ஆதரவு, ஏகாதிபத்திய ஆதரவு கொள்கைகளின் சாரமான விளைபொருள். கொள்கைகளிலும் அரசியலிலும் வரையறை மாற்றம் கோரும் ஓர் உணர்வுமிக்க போராட்டம் மட்டுமே மோடியின் கார்ப்பரேட் மதவெறி நிகழ்ச்சிநிரலை அம்பலப்படுத்தி எதிர்கொள்ள முடியும்.

டில்லியின் குறிப்பான சூழலில் ஆம் ஆத்மி கட்சி பெற்றுள்ள வெற்றி இந்த போர்த் தந்திரத்தை மெய்ப்பிக்கிறது. ஆம் ஆத்மி கட்சி விடாப்பிடியான கார்ப்பரேட் எதிர்ப்பு போராட்டங்கள் நடத்துகிற கட்சி அல்ல; அது இதுவரை முன்வைத்துள்ள நிகழ்ச்சிநிரலை, அடிப்படையான சமூக - பொருளாதார மாற்றம் என்றல்ஷலாமல், ஆட்சி முறையை, சட்டரீதியான கட்டமைப்பு முறையை நவீனப்படுத்துவது என்று வேண்டுமானால் அழைக்கலாம்.

ஆனால், கட்சி உருவாக்கம், தேர்தல் போராட்டம் என்ற இயக்கப் போக்கில், ஜன் லோக்பால் என்ற ஒற்றை கருப்பொருளில் இருந்து, குடிமை வசதிகள், நகர்ப்புற வறியவர்கள் மற்றும் கீழ்நடுத்தர பிரிவினரின் அடிப்படை உரிமைகள் மற்றும் ஒப்பந்தத் தொழிலாளர்களை நிரந்தரப்படுத்துவது போன்ற தொழிலாளர் வர்க்கப் பிரச்சனைகள் ஆகியவற்றுக்கு அது தனது நிகழ்ச்சிநிரலை விரிவுபடுத்த நேர்ந்தது.

காங்கிரசுக்கு எதிராக தனது பிரச்சாரத்தில் கவனம் குவித்த ஆம் ஆத்மி கட்சி, பாஜகவுக்கு எதிராகவோ, அதன் கார்ப்பரேட் - மதவெறி அரசியல்வகை, பிற்போக்கு கண்ணோட்டம், ஒடுக்குமுறை ஆட்சி ஆகியவற்றுக்கு எதிராகவோ, குறிப்பாக குரல் எழுப்பவில்லை. ஆனால், இப்போது ஆம் ஆத்மி கட்சி புறநிலையில், பாஜகவுக்கு எதிராக நிறுத்தப்பட்டுள்ளது; அது பாஜக விசயத்தில் திட்டவட்டமாக நிலை எடுக்காத ஒரு நிலையை இனியும் தொடர முடியாது.வரலாற்று ரீதியாக, நாட்டு விடுதலை போராட்டத்திலும் விடுதலைக்குப் பிந்தைய அரசியலிலும் கம்யூனிஸ்டுகளே, மேலோங்கிய காங்கிரஸ் அல்லாத நீரோட்டமாக இருந்தனர்.

இன்று காங்கிரசின் வீழ்ச்சியில் பயன்பெறும் ஆகப்பெரிய கட்சியாக பாஜக எழுந்துள்ளது என்றால், அது இடதுசாரிகளின் மிகப்பெரிய தோல்வியை காட்டுகிறது. இந்த தோல்விக்கான அடிப்படை காரணம், மேற்கு வங்கத்தில் இடதுசாரி தலைமையிலான ஆட்சி அரசியல்ரீதியாக தடம் புரண்டதும், ஆளும் வர்க்க கட்சிகளுடன் விமர்சனமற்ற வால்பிடிக்கும் கூட்டணிகள் அமைக்கும் சந்தர்ப்பவாத அரசியலும்தான் என்று இடதுசாரிகளுக்குள்ளேயே பல குரல்கள் இன்று ஒப்புக்கொள்கின்றன. இந்த ஒப்புதலை தத்துவத்திலும் நடைமுறையிலும் ஒரு மாற்று வழித்தடமாக மாற்றுவது மட்டும்தான், உழைக்கும் மக்களின் ஜனநாயக அறிவாளிப் பிரிவினரின் வெகுமக்கள் அணிதிரட்டல் மூலம் இடதுசாரி புத்தெழுச்சிக்கு இட்டுச் செல்லும்.

தற்போதைய சூழல், புரட்சிகர இடதுசாரிகளின் சக்திவாய்ந்த அறுதியிடலுக்கு போதுமான அளவு உள்ளாற்றல் கொண்டிருக்கிறது. நெருக்கடியில் இருந்தும் காங்கிரசின் சரிவில் இருந்தும் பாஜக ஆதாயம் பெற முடியும் என்றால், மாற்றமும், காங்கிரஸ் மற்றும் பாஜகவின் அழுகிப்போன ஆட்சி முறைகளுக்கு மாற்றும் கோரும் வெகுமக்கள் வேட்கை மீது செயலாற்றி ஆம் ஆத்மி கட்சி போன்ற ஒரு புதிய கட்சி தனது இருத்தலை உணரவைக்க முடியும் என்றால், அனைத்துத் தடைகளையும் கடந்து, சமூக மாற்றத்தின் வலுவான ஆதாரமாக இருந்து வருகிற புரட்சிகர இடதுசாரி சக்தியும், மக்களின் இன்னும் வலுவான அணிதிரட்டல் மற்றும் அறுதியிடலுக்காக, பாசிச பிற்போக்கு சக்திகளுக்கு எதிராக கூடுதல் திறன்மிக்க கருத்தியல் - அரசியல் தலையீட்டுக்காக, சூழலில் இருந்து வலுப்பெற வேண்டும்.

தேவயானியும் சங்கீதாவும்

தேவயானி அய்க்கிய அமெரிக்காவால் சிறுமைப்படுத்தப்பட்டுள்ளார். ஒப்புக்கொண்டதைக் காட்டிலும், அய்க்கிய அமெரிக்க சட்டப்படியான குறைந்தபட்சக் கூலியைக் காட்டிலும் தம் இல்லப்பணியாளருக்கு குறைந்த சம்பளத்தைத் தந்தார் எனக் காரணம் சொல்லப்பட்டு, ஆடை அவிழ்ப்பு சோதனை கைவிலங்கு பூட்டப்படுதல் ஆகியவற்றுக்கு ஆளாக்கப்பட்டுள்ளார்.

அய்க்கிய அமெரிக்காவிற்கு இப்படிச் செய்ய யோக்கியதை கிடையாது. அய்ரோப்பிய நாடுகளின் அயலுறவு துறையினரை அவர்கள் இப்படி நடத்துவதில்லை. பாகிஸ்தானில் அயல்விவகார அலுவலர் போர்வையில் செயல்பட்ட சிஅய்ஏவின் அதிகாரி கொலை செய்தபோது, அவரை சிறுகீறல் கூட இல்லாமல் காப்பாற்றினார்கள்.

நமது ராணுவ அமைச்சர் ஜார்ஜ் பெர்ணான்டஸ் முதல் பல முக்கிய பிரமுகர்களை தொடர்ந்து அவமானப்படுத்தியுள்ளனர். மும்பை குண்டுவெடிப்போடு தொடர்புப்படுத்தப்பட்டுள்ள ஹெட்லியை இந்திய விசாரணைக்கு அனுப்ப மறுக்கிறார்கள்.

இந்தப் பின்னணியில், தேவயானி விசயத்தில் இந்திய மக்களின் சீற்றம் நியாயமானது. நடிப்பு சுதேசிகள் அய்க்கிய அமெரிக்க விசுவாசிகள் துள்ளிக் குதித்து தேசபக்த ஆட்டம்போடும்போது, இடதுசாரி மாணவர், இளைஞர் இயக்கத்தினர் அவர்களிடம் இருந்து மாறுபடாமல் ஒரு சார்பு மிகையழுத்தம் வைத்திருக்கக் கூடாது.

தேவயானி வீட்டில், இல்லப்பணியாளர் சங்கீதாவுக்கு நடந்ததை தயங்காமல் கண்டனம் செய்ய வேண்டும். ஒப்பந்தத்தில் ஒரு சம்பளம், கையில் குறைவான வேறு சம்பளம், குறைந்தபட்ச சம்பளத்துக்கும் குறைவான சம்பளம் என்பதை ஏற்க முடியாது. இந்திய இல்லப் பணியாளர்க்கு சொந்த நாட்டில் உள்ள கதிதான், வெளிநாடுகளுக்கு நம் அயல்விவகாரத் துறையினரின் இல்லப்பணியாளர்களாக செல்லும்போதும் நடக்கும் என்பது இந்தியாவுக்கு கவுரவம் தராது.

நியாயமான சம்பளம் தரும் அளவுக்கு தேவயானியின் சம்பளம் இல்லை என்றால் அவர் அரசிடம் கூடுதல் சம்பளம் கேட்டுப் பெறட்டும்; அல்லது வேலைக்கு ஆள் வைக்காமல் இருக்கட்டும்.

எல்ஜிபிடியினரை அரவணைப்போம் 377ன் மோசமான பகுதிகளுக்கு விடை கொடுப்போம் - எஸ்.குமாரசாமி

சுயபால் ஈர்ப்புடைய பெண்கள், ஆண்கள், இருபால் ஈர்ப்பும் உடையவர்கள், பால் மாற்றம் செய்தோர் தலை மீது, மீண்டும் இபிகோ 377 கத்தி தொங்குகிறது.

இந்தியாவில் பழையவற்றுக்கும் புதியவற்றுக்கும் இடையிலான போர் தொடர்கிறது. உலகளாவிய அளவில், வரலாற்றுரீதியாக வழக்கொழிந்துபோன முதலாளித்துவம், நடைமுறையில் ஆட்கொல்லியாய் ஒட்டுண்ணியாய் நீடிக்கிறது.

பழையவை மரணத்தை நோக்கிச் சென்றாலும் சாகாமல் இருக்க, சாவைத் தள்ளிப்போட, உயிர்த்தெழ, புதியவற்றின் மீது மூர்க்கமாகப் போர்தொடுக்கின்றன. புதியவை, கருக்கொண்டுவிட்டாலும், கருப்பையிலிருந்து இன்னமும் வெளியே வரமுடியவில்லை. மரணத்தின் பள்ளத்தாக்குகளில் இருந்து எழுகிற ஆவேசக் கூச்சல்களை, வாழ்வின் சமவெளிகளில் இருந்து எழுகிற உயிர்த் துடிப்புள்ள மானுட இசை எதிர்கொள்கிறது. அநியாயமான பழையவை வீழ்வதும் நியாயமான புதியவை வெல்வதும், துரிதப்படுத்தப்பட வேண்டும்.

இகக மாலெ இந்திய சமூகத்தை பின்வருமாறு விவரிக்கிறது. ‘இந்தியா ஒரு மேலோங்கிய விவசாய, பின்தங்கிய முதலாளித்துவ சமூகம் ஆகும்; விடாப்பிடியான நிலப்பிரபுத்துவ மிச்ச சொச்சங்கள், அப்பட்டமான காலனிய எச்சங்கள் சமூகத்தை முடக்குகின்றன; இவை, சமூகத்தில் இருந்து மறுஉறுதி செய்யப்படுகின்றன; இந்தச் சமூகம் பேராசைமிக்க உலக மூலதனம் மற்றும் ஏகாதிபத்தியத்தின் ஆதிக்கத்தின் கீழ் தடுமாறுகிறது’.

ஒரு பக்கம் லாபங்கள் மறுபக்கம் மக்கள் மற்றும் பூவுலகம், இவற்றுக்கிடையில் யாருக்கு முதன்மை இடம் என்ற சண்டை, பரவுகிறது, தீவிரமடைகிறது. மண்ணிலும் விண்ணிலும் சரி பாதிக்குச் சொந்தம் கொண்டாட பாத்தியதை உடைய பெண்கள் அச்சமற்ற சுதந்திரத்துக்கான பயணத்தை துவங்கிவிட்டார்கள். பிற்போக்கு பதறுகிறது. முன்னே வருபவர்களை பின்னே தள்ள வெறியாட்டம் போடுகிறது. மேல்சாதி ஆதிக்கம், பெரும்பான்மை மதவெறி, ஆணாதிக்கம், முதலாளித்துவச் சுரண்டல் ஏகாதிபத்திய தலையீடு என எல்லாமே சவாலுக்கு உள்ளாக்கப்பட்டுள்ளன.

ஆணும் பெண்ணும் பருவத்திற்கேற்ப இயற்கையாக, சாதி மதம் மொழி இனம் தாண்டி காதலிப்பதற்கு எதிராக 2013ல் கூப்பாடு போடும் கூட்டம், ஆணுக்கும் ஆணுக்கும் பெண்ணுக்கும் பெண்ணுக்கும் இடையில் ஏற்படும் ஈர்ப்பு, ஆணோ, பெண்ணோ மாற்றுபால் ஈர்ப்போடு கூடவே ஏற்படும் சுயபால் ஈர்ப்பு, பால் மாறுவோர் எல்ஜிபிடி - விசயத்தில், உலகின் முடிவு நெருங்குவதாக ஊளையிடுகின்றனர்.

டில்லி உயர்நீதிமன்றத்தின் ஏ.பி.ஷா மற்றும் முரளிதர் என்ற இரண்டு நீதிபதிகள் அமர்வம் 02.07.2009 அன்று, நாஸ் பவுண்டேசன் தொடுத்த வழக்கில், இந்திய தண்டனைச் சட்டத்தின் பிரிவு 377, வயது வந்தோர்க்கிடையில் சம்மதத்துடன் ஏற்படும் ஒருபால் உறவுகளை நடவடிக்கைகளை குற்றமயமாக்குவது, இந்திய அரசியலமைப்புச் சட்டத்தின் 14, 15, 21 பிரிவுகளுக்குப் புறம்பானது என்று தீர்ப்பு வழங்கியது.

ஆனால், இந்திய உச்சநீதிமன்ற நீதிபதிகள் சிங்வி, முகோபாத்யாயா அமர்வம், தமது 11.12.2013 தீர்ப்பின் மூலம் காலச்சக்கரத்தை பின்னோக்கி திருப்ப முயற்சித்துள்ளது. இபிகோ பிரிவு 377 அரசியலமைப்புச் சட்டத்துக்கு முரணானது அல்ல என்றும், அரசியலமைப்புச் சட்டப் பிரிவு 14 மற்றும் 21 மீறலைக் காண முடியவில்லை என்றும் சட்டப் பிரிவை மாற்றும் திருத்தும் நீக்கும் வேலையை நாடாளுமன்றத்துக்கு விட்டுவிட்டு நீதிமன்றம் பவ்யமாக ஒதுங்கி நிற்க வேண்டும் என்றும் சொல்லி, டில்லி நீதிமன்றத் தீர்ப்புக்கு எதிரான மேல்முறையீட்டை அனுமதித்து, நான்கு வருடங்களாக செத்திருந்த 377க்கு உயிர் கொடுத்தது.

உச்சநீதிமன்றம் சொன்ன காரணங்கள்

1. எல்ஜிபிடி பிரிவினர், துண்டுதுக்காணி சிறுபான்மையினர்;

2. காலனிய ஆட்சியில் வந்த பல சட்டங்கள் அரசியலமைப்புச் சட்டம் சுதந்திர இந்தியாவில் வந்த பிறகும் ஏற்கப்பட்டுள்ளன, ஆகவே அதேபோல், 1860 இபிகோ பிரிவு 377ம் அரசியலமைப்புச் சட்டத்துக்கு முரணானது அல்ல என்ற சாதக அனுமானமே (Presumption) செய்ய வேண்டும்;

3. நீதிமன்றம் சட்டத்தில் கைவைக்கக் கூடாது, குறிப்பாக, இபிகோவில் சமீபத்தில் கூட திருத்தங்கள் செய்யப்பட்டு, 377 பிரிவு திருத்தப்படாததால், பிரிவு 377 திருத்தம் அல்லது நீக்கத்தை நாடாளுமன்றத்திடம் விட்டுவிடலாம்.

1. துண்டுதுக்காணி சிறுபான்மையினர் என்றால் அதற்கேற்ப, அரசியலமைப்புச் சட்ட பாதுகாப்பு பல மடங்கு கூடுதலாக வேண்டுமே தவிர, பாதுகாப்பே இல்லை என்று சொல்வது அரசியலமைப்புச் சட்டத்தை குழி தோண்டி புதைப்பதாகாதா?

டில்லி உயர்நீதிமன்றத்தில் வழக்கு நடக்கும்போது, மத்திய அரசு தந்த விவரங்கள்படி, ஒருபால் ஈர்ப்புடைய ஆண்கள் 25 லட்சம் பேர்; ஒருபால் ஈர்ப்புடைய பெண்களும் பால் மாறியோரும் பல லட்சம் பேர். அதன்முன் உள்ள ஆவணங்கள்படி, பல லட்சம்பேர் எல்ஜிபிடி பிரிவினர் எனத் தெரியும்போது, துண்டுதுக்காணி சிறுபான்மையினர் என்ற உச்சநீதிமன்றத்தின் வாதம் பொருந்தாது.

150 ஆண்டுகளாக 200 பேர் மட்டுமே குற்ற நடவடிக்கைக்கு ஆளாக்கப்பட்டுள்ளனர் என ஏதோ ஓர் அரைகுறை விவரத்தைப் பிடித்துத் தொங்கி, பல லட்சம் பேர் சிறுமைப்படுத்தப்படுதல் துன்புறுதல் ஆகியவற்றையும் நாடெங்கும் சில லட்சம் பேர் காவல்துறையாலும் சமூக விரோதிகளாலும் தாக்கப்படுவதையும் பார்க்க மறுத்தது எப்படி சரியாகும்?

நடவடிக்கைக்குத்தான் தண்டனையே தவிர ஒருபால் ஈர்ப்புடையோருக்கு ஒரு பிரிவினராக தண்டனையில்லை என்பது வெற்று வாதம். மட்டுமின்றி, காவல்துறை மற்றும் இதரரின் ஒடுக்குமுறை அதிகாரத்தை 377 வழங்கவில்லை, மன்னிக்கவில்லை என்று சொல்வது, சமூகயதார்த்தத்தை காண மறுப்பதாகும்.

2 மற்றும் 3. சட்டத்தை, உயிர்த்துடிப்புள்ள வாழ்வோடு பொருத்தி வியாக்கியானம் செய்ய வேண்டும். (சிறுவர் மீதான வன்புணர்ச்சி மனிதர் அல்லாத ஜீவராசிகளுடன் புணர்ச்சி ஆகியவை தொடர்பாக விவாதம் ஏதும் இல்லை. அந்தச் செயல்களை குற்றமயமாக்கும் பிரிவு 377 பகுதிகள், கேள்விக்கு உள்ளாக்கப்படவில்லை). 1290, 1300 வருடங்களில் ஒருபால் புணர்ச்சிக்கு எரித்துக் கொல்லும் தண்டனைதான் இங்கிலாந்தில் இருந்தது.

1533, 1563 சட்டங்கள் அதை தூக்கு தண்டனை ஆக்கின. 1861ல் இந்த விசயத்தில் மரண தண்டனை நீக்கப்பட்டது. இந்தக் கால கட்டத்தில்தான், இங்கிலாந்தின் குற்றம் மற்றும் தண்டனை தொடர்பான சட்டங்கள் இந்தியா போன்ற காலனி நாடுகளுக்கும் விரிவுபடுத்தப்பட்டன. இங்கிலாந்தின் பாலியல் குற்றங்கள் சட்டம் 1967, 21 வயதுக்கு மேற்பட்டவர்கள் சம்மதத்துடன் ஒருபால் உறவில் ஈடுபடுவது குற்றமல்ல என்றது.

உலகம் முழுவதும், பால் - அடையாளம் என்பவை தனிமனிதர்களின் உரிமைகள் கவுரவம் தொடர்பானவை என்ற சிந்தனை வலுப் பெறத் துவங்கியது. 1995ல் 33 அய்ரோப்பிய நாடுகள் ஒருபால் உறவு குற்ற நடவடிக்கை அல்ல என முடிவெடுத்துவிட்டன. டாஸ்மானியா நீங்கலாக ஆஸ்திரேலியாவிலும் ஒருபால் உறவு குற்றமல்ல. ஒருபால் உறவை குற்றமாக்குவது, கவுரவம், உள்ளடக்குவது, அனைவரையும் மதிப்பது என்பவற்றுக்கு பொருந்தாது என அய்நா மனித உரிமைகள் உயர்ஆணையர், 56 நாடுகள் கூட்டறிக்கை அடிப்படையில் கூறினார். அய்க்கிய அமெரிக்காவில் ஒருபாலினர் இடையில் திருமணமே சட்டபூர்வமானது என்ற நிலை வந்துவிட்டது. கனடாவும் தென்னாப் பிரிக்காவும் நவீனத்தின் பக்கம் வந்துவிட்டன.

ஒருபால் உறவு உள்ள ஆண்கள், 377 பிரிவின் காரணமாக எய்ட்ஸ் நோய் வந்தாலும், பரவாமல் தடுப்பது, சிகிச்சை ஆகியவற்றுக்குச் செல்ல தயங்குகிறார்கள். ஒருபால் உறவை அலமாரிக்குள் மூடி மறைக்க வேண்டிய தலைமறைவாக்க வேண்டிய நிலையை 377 உருவாக்குகிறது. மத்திய அரசின் சுகாதாரம் மற்றும் குடும்ப நலத்துறை அமைச்சகம், டில்லி உயர்நீதிமன்றத்தில் ஒருபால் உறவை குற்றமற்ற தாக்கச் சொன்னது.

ஆகஸ்ட் 8 2008ல் இந்தத் துறையின் மத்திய அமைச்சர் மருத்துவர் அன்புமணி ராமதாஸ் மெக்சிகோவில் நடந்த எய்ட்ஸ் தொடர்பான மாநாட்டில் 377அய் நீக்க வேண்டும் என்றார். (காண்க: 09.08.2008 தேதிய இந்தியன் எக்ஸ்பிரஸ்). இந்திய சட்ட ஆணையத்தின் 172ஆவது அறிக்கை பிரிவு 377அய் நீக்க பரிந்துரைத்துள்ளது.

பொது மருத்துவர்களும் மனநல மருத்துவர்களும் ஒருபால் ஈர்ப்பு ஒரு நோயல்ல, ஒரு உடல், மன நலக்கேடல்ல மாறாக, அது மானுட பாலியல் விருப்பத்தின் ஒரு வெளிப்பாடே என உலகெங்கும் அறிவிக்கின்றனர். உலக சுகாதார அமைப்பு 1992ல் ஒருபால் உறவை, தான் தயாரித்திருந்த மனநோய்கள் பட்டியலிலிருந்து நீக்கியது. மக்கள் பிரிவின் ஒரு சிறுபான்மை அவர்கள் தேர்வு செய்யாத, அவர்கள் மாற்றிக் கொள்ள முடியாத, ஓர் உள்ளார்ந்த இயல்புக்காக குற்றமயப்படுத்தப்படுவதும் சிறுமைபடுத்தப்படுவதும், சமத்துவம், சுதந்திரம், உயிர்வாழ்தல் என்ற அடிப்படை உரிமைகளுக்கு விரோதமானவை.

காலனிய ஆட்சிக் காலத்தின் 1894 நிலம் கையகப்படுத்துதல் சட்டம், 2013ல் நீக்கப்பட் டுள்ளது. நாடாளுமன்றம் ஒரு சட்டப்பிரிவை நீக்காமல் திருத்தாமல் இருப்பதற்கு, நாடாளு மன்றம் அதனை நீக்கத் தயாரில்லை என்று தவறாக காரணம் கற்பித்து, நீதிபதி சிங்வி 377அய் திருத்துகிற மாற்றுகிற வேலை நாடாளுமன்றத்துடையது என்று வழிவிட்டு ஒதுங்குவது ஏற்புடையதல்ல.

 இது ஒரு சொத்தையான வாதமாகும். ஏனெனில் ஏஅய்ஆர் 1983 உச்சநீதிமன்றம் பக்கம் 473ல் பிரசுரமாகியுள்ள மித்து எதிர் ஸ்டேட் ஆஃப் பஞ்சாப் வழக்கில், இதே உச்ச நீதிமன்றத்தின் அய்ந்து நீதிபதிகள் அடங்கிய அரசியலமைப்புச் சட்ட அமர்வம், இதே இபிகோ பிரிவு 303, ஆயுள்தண்டனை கைதி கொலை செய்தால் அந்தக் குற்றத்துக்கு நிச்சயம் மரண தண்டனை என்று நிர்ணயம் செய்தது, அரசியலமைப்புச் சட்டத்துக்கு விரோதமானது என அந்தப் பிரிவை நீக்கம் செய்துள்ளது. அந்தச் சட்டப் பிரிவு நீதிமன்றத்தின் கைகளில் தான் மரணத்தைச் சந்திக்க வேண்டியுள்ளது என்றும் குறிப்பிட்டுள்ளது.

உச்சநீதிமன்றம் சொல்லாத விசயங்கள்

அ) பிரிவு 377 பொது வெளி, தனிவெளி வித்தியாசங்களையோ, சம்மதம், சம்மதமின்மை விசயங்களையோ, கணக்கில் கொள்ளவில்லை என்பதை உச்சநீதிமன்றம் கவனிக்கவில்லை.

ஆ) அரசியலமைப்புச் சட்டத்தின் பிரிவு 15, குடிமக்களை பால் அடிப்படையில் வேறு படுத்தக்கூடாது என்று சொல்லியிருப்பது, பாலியல் சாய்வு அடிப்படையில் வேறுபடுத்தக்கூடாது என்பதையும் உள்ளடக்கும் என டில்லி நீதிமன்றம் சொல்லியுள்ளது. உச்சநீதிமன்றம் இது பற்றி பேசவே இல்லை.

இ) ஆட்டக் களத்தில் போட்டியிட்ட இரண்டு அணிகள், அதாவது, முக்கிய தரப்பினர், அல்லது அணித்தலைவர்கள், நடுவர் முடிவை ஒப்புக்கொண்ட பிறகு, பார்வையாளர்கள், முடிவை மாற்றச் சொல்லி கோர முடியாது. ஆகஸ்ட் 2013ல் ஹாலிங்ஸ்வொர்த் எதிர் பெர்ரி என்ற வழக்கில் அய்க்கிய அமெரிக்காவின் உச்சநீதிமன்றம், மேல்முறையீட்டில் மூன்றாம் தரப்பினருக்கு வாய்ப்பே தர முடியாது என திட்டவட்டமாகச் சொன்னது. ஒரு வேளை இந்தத் தீர்ப்பை எதிர்கொள்ளாமல் தவிர்க்கவே, அந்நிய நாடுகளின் தீர்ப்புக்கள் வேண்டாமே என்றார் நீதிபதி சிங்வி.

முக்கியமாக, டில்லி உயர்நீதிமன்றத்தில் எதிர் வழக்காடிய மத்திய அரசு, விசயம் உச்சநீதிமன்றத்துக்கு வந்த பிறகு, தனது அமைச்சர் குழு, டில்லி தீர்ப்பில் குறைகாண ஏதும் இல்லை என முடிவுக்கு வந்ததாக சொல்லிவிட்டது. அதற்குப் பிறகு, துண்டுதுக்காணி சிறுபான்மையினர் வழக்கு என பிரச்சனையை அணுகிய உச்சநீதிமன்றம், டில்லி உயர்நீதிமன்றத்தில் தரப்பினராக இல்லாத ஓரஞ்சார, பித்துப்பிடித்த, மதவாத பிற்போக்காளர்களின் மேல்முறையீட்டை எப்படி அனுமதிக்கலாம் என்பதற்கு உச்சநீதி மன்றத்திடம் எந்த பதிலும் இல்லை.

ஈ) உண்மையில், வெளியே வராமல் ஒளிந்திருப்பது மறைந்திருப்பது, இயற்கைக்கு விரோதமான உறவு என்ற பத்தாம்பசலித்தனமான கருத்தின் அடிப்படையிலான,  நீதிமன்றத்தின் பொது அறம் பற்றிய கவலையே ஆகும். அலகாபாத் உயர் நீதிமன்றம் பாப்ரி மசூதி இடிக்கப்பட்ட இடத்தில் ராமன் கோயில் இருந்தது என்ற மக்கள் நம்பிக்கைப்படி தீர்ப்பு வழங்கியது. இந்திய உச்சநீதிமன்றமும் அப்சல் குருவுக்கு மக்களின் மனசாட்சியை திருப்திப்படுத்த தூக்குதண் டனை விதித்தது. நீதிபதிகள் சிங்வியும் முகோபாத்யாயாவும் இந்த அணுகு முறையை, வெளியே சொல்லிக் கொள்ளாமல் பின்பற்றியுள்ளனர்.

டாக்டர் அம்பேத்கர், ‘அரசியல்லமைப்புச் சட்ட அறநெறி என்பது ஓர் இயற்கையான உணர்வல்ல, அது பேணி வளர்க்கப்பட வேண்டும்; நமக்கு, நம் மக்கள் அதனை இன்னமும் கற்க வேண்டும் எனப் புரிந்துகொள்ள வேண்டியுள்ளது; சாராம்சத்தில் ஜனநாயகமற்ற இந்திய மண்ணில் ஜனநாயகம் ஒப்பனை மேல் அலங்காரமே’ என்று சொல்லியுள்ளதை நீதிபதிகள் கணக்கில் கொண்டிருந்தால் விவகாரம் வேறு விதமாக முடிந்திருக்கலாம்.

சமூக பழைமைவாத உச்சநீதிமன்ற தீர்ப்பின்பால் இகக மாலெ, இகக, இககமா, திரிணாமூல் காங்கிரஸ், அய்க்கிய ஜனதா தளம், ஆம் ஆத்மி கட்சி ஆகியவை அதிருப்தி தெரிவித்துள்ளது சமூகம் மாறுவதன் பிரதிபலிப்பே.
தமிழகத்தில் பெரியாரின் சிஷ்யர்கள் எனச் சொல்லிக் கொள்ளும் கழகங்கள், வைகோ போன்றவர்கள் மூலம், 377 இருந்தாக வேண்டும் என கலாச்சார தேசியம் பேசுகின்றனர்; அஇஅதிமுக, திமுக போன்றவை மவுனம் சாதிக்கின்றன. அவர்களுக்கும் தமிழ்நாட்டு மக்களுக்கும் 01.01.1942ல் பெரியார் ‘பெண் ஏன் அடிமையானாள்?’ நூலில் சொன்னதை கவனப்படுத்துவோம்.

‘ஒரு ஆணின் அல்லது ஒரு பெண்ணின் அன்பு, ஆசை, காதல், காமம், நட்பு, நேசம், மோகம், விரகம் முதலியவைகளைப்பற்றி மற்றொரு பெண்ணோ, ஆணோ மற்றும் மூன்றாமவர் யாராயினும் பேசுவதற்கோ, நிர்ணயிப்பதற்கோ நிர்ப்பந்திப்பதற்கோ சிறிதுகூட உரிமையே கிடையாது என்றும் சொல்லுகிறோம்.... இன்னும் சிறிது வெளிப்படையாய், தைரியமாய் மனித இயற்கையையும், சுதந்திரத்தையும், சுபாவத்தையும், அனுபவத்தையும் கொண்டு பேசுவதானால், இவை ஒரு மனிதன் தனக்கு இஷ்டமான ஒரு ஓட்டலில் சாப்பிடுவதுபோலவும், தனக்குப் பிடித்த பலகாரக் கடையில் பலகாரம் வாங்குவது போலவும், அவனுடைய தனி இஷ்டத்தையும், மனோபாவத்தையும், திருப்தியையும் மாத்திரமே சேர்ந்ததென்றும், இவற்றுள் மற்றவர்கள் பிரவேசிப்பது அதிகப்பிரசங்கித்தனமும், அனாவசியமாய் ஆதிக்கம் செலுத்துவதுமாகும் என்றும்தான் சொல்ல வேண்டும்’.
அன்று காதல் பற்றி பெரியார் சொன்ன விசயங்கள் நிச்சயமாக இன்று ஒருபால் ஈர்ப்புப்பற்றி அவர் அவற்றை ஒத்த விசயங்களைத்தான் பேசியிருப்பார் என்பதை புலப்படுத்தும். பெரியாருக்கு துரோகம் செய்தவர்களிடம் இருந்து பெரியாரையும் தமிழகத்தையும் விடுவிப்போம். எல்ஜிபிடியினரை அரவணைப்போம். 377ன் மோசமான பகுதிகளுக்கு விடை கொடுப்போம்.

Search